麥明詩貪靚一仆一碌

港姐出身嘅麥明詩（Louisa），同一樣係港姐冠軍嘅馮盈盈，喺J2台主持嘅清談節目《後生仔傾吓偈》裏面，成日語出驚人，講嘢踩界出位，同時抵死令人笑爆嘴！難得，佢哋冇港姐包袱，冇為顧全形象而說話就住就住，令節目生色不少。

早前，呢對「雙妹嘜」又孖住喺《BigBigChannel大公司周年慶》中擔任司儀。鏡頭前面，見到Louisa淡淡定有錢剩，相當有大將之風。不過，東姑喺鏡頭背後，就成晚見到晒佢啲「蝦碌」嘢。最出事都係，佢着嗰對五吋高又斗零踭嘅高跟鞋，見佢成晚都好唔自在，頻頻踎低整對鞋之餘，仲有幾次差啲仆親，好在每次都有人扶一扶，先未至於五體投地，失禮人前。好多時，女仔都鍾意「抵冷貪瀟湘」，而Louisa呢隻，就係貪靚甘冒「扒街」嘅危險，真係服咗佢囉。

捱到節目尾聲，見到曙光即將可以收工鬆口氣嘅Louisa，仲同面露「慘豬豬」樣嘅馮盈盈，好似心意相通咁，互相打咗個眼色，然後手指指似係問候一吓對方，真係姊妹情深喇！

Louisa着住呢對五吋高斗零踭高跟鞋，簡直似雜技團表演，行得穩都好高難度啫！

Louisa幾次行都行唔穩，差啲就要失平衡仆低嘅時候，好彩都有人喺身邊，出手相救。

似係着唔慣對鞋嘅Louisa，成晚頻頻踎低身，彎腰整對鞋。

喺鏡頭背後，Lousia頻頻驚險百出，上落台時都差啲畀電線絆倒。

估計馮盈盈都係好艱難先捱到節目尾聲，見佢拍ending時面露呢個「慘豬豬」樣，似係覺得終於收工鬆口氣。

呢對「雙妹嘜」唔只做節目時合拍，連做大騷司儀嘅辛苦同壓力，都心照不宣，仲隔空互相打氣問候一番。