為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 08 月 05 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

Music迦油站

音樂能力無遠弗屆,為樂迷注入能量,數到香港突出嘅音樂人,AGA(江海迦)一定榜上有名。從佢嘅歌曲受歡迎程度,就知道佢內外兼備,嚟緊佢即將舉行音樂會,繼續為樂迷加油。

今次「Paco巨星飯堂」,我就帶AGA去到位於中環嘅「F Word」,品嘗特色嘅fusion菜式,暢談佢即將舉行嘅音樂會,仲有佢嘅特別創作方式。

喺新一代唱作人中,AGA可謂係其中一位代表人物,才華、唱功兼備,所以「圈粉」能力高,令佢要接連開show慰粉絲。

 

撐本地藝術

AGA兩年前首次舉辦個人音樂會,今年再喺香港開show,但今次唔係賣飛show,而係為咗支持本地藝術創作。「今次嘅規模係中小型,同Mini Cooper合作,想做一個show出嚟,支持本地嘅藝術,粉絲可以捐$250,支持本地藝術學院嘅學生,就可以換飛。

「其實今年係我做咗好多唔同嘗試嘅一年,一月開始,我已經喺內地做咗幾個巡迴演唱會,自己亦都係第一次喺內地開騷,啱啱上星期完成佛山演唱會,感覺同第一次開騷已經好唔同,內地觀眾好熱情同好supportive,由你一行出嚟,佢哋已經開始叫喊,同香港好唔同,佢哋會好留心你帶一個咩message俾佢哋。」

講到今次「回歸」嘅音樂會,AGA就話:「今次呢個show想帶出唔同嘅theme,話明係本地創作藝術,而我自己都係做創作出身,所以我會玩好多寫俾人哋嘅歌,或者自己嘅歌嘅Demo,仲有一啲未出過街嘅Demo。

「今次有啲歌同原曲唔同,係re-arrange嘅,同埋我請咗幾位朋友,過嚟一齊jam歌。另外,我好想唱番一啲英文classic嘅歌,其中一首係我好鍾意嘅〈With A Little Help from My Friends〉,我係聽Joe Cocker版本嘅,re-arrange之後,可以玩得Jazz少少、Groovy少少。」

我帶AGA去到位於中環嘅「F Word」,品嘗特色嘅fusion菜式,暢談佢即將舉行嘅音樂會,仲有佢嘅獨門創作秘訣。

 

為咗本周舉行嘅《MINI x AGA & Friends音樂會》,AGA積極準備多首歌曲,到時實行以歌會知音。

 

炸魚墨西哥夾餅($88),炸漿加入適量啤酒,提升爽脆感,配上夾餅及帶酸嘅醬汁,令菜式更具層次感。

 

雞肝醬配自家製番茄醬($118),兩者為餐廳澳洲籍老闆嘅家傳秘方,極有家的味道。

 

經年〈小問題〉

音樂會以外,AGA嘅新歌〈小問題〉,都係相當受歡迎嘅作品。「呢首歌係四年前寫嘅,嗰陣時啱啱寫咗另一首歌叫〈一〉,同期寫咗〈小問題〉。我一直以嚟都鍾意寫R&B、比較groovy少少嘅歌,我長大嘅時候,好鍾意聽黑人音樂,Stevie Wonder直情係我嘅終生偶像,仲有Ray Charles同Alicia Keys,所以我嘅歌,好多都係Black Culture Influence。

「嗰時我啱啱入行,寫咗好多R&B嘅歌,但係冇一隻出到,寫〈一〉時都係出多啲慢歌,於是嗰時公司話擺住喺度先,總有機會出嘅。(Paco:「寫R&B嘅歌對寫詞人係一個挑戰嚟o架。」)係吖!好有難度,好難catcho架!所以我寫我隻新碟《Luna》時,我有三首歌都係比較groovy啲嘅,啲歌詞都要係咁改,無論歌詞或編曲上都要改好多,啱番做廣東話嘅歌。我由上次隻碟《Ginadoll》之後,一直都想做隻首首歌都係唔同風格嘅碟。因為我由細到大聽好多唔同音樂,我好想將呢啲音樂嘅元素變做廣東話,加入廣東話裏面。」

講到下廚,AGA表示因為其母愛甜點,特別係糕點,所以佢經常為媽媽製作愛心糕餅。

 

雖然新曲〈小問題〉係AGA嘅舊作,但都係佢嘅心血結晶,MV拍攝亦一絲不苟,佢以多個特別造型演出。

 

 

 

啱啱完成中國巡迴演出,AGA話內地粉絲表現熱情,令佢更有力量演唱。

 

冬蔭功青口($168),選用來自荷蘭嘅青口,以泰式手法烹調,別有一番風味。

 

香煎北海道帶子($148),將帶子煎得外脆內鮮,極考工夫。

 

港式Favourite

AGA嘅創作令唔少樂迷有所共鳴,佢話自己嘅靈感係來源,原來係:「我係一個好容易感動嘅人,同啲朋友睇戲,睇完戲我都係唔出聲,我好容易將好小嘅情感放大,(你感情豐富啫!)所以如果睇啲唔開心嘅戲,嗰日成個人都會好沉,所以音樂對我嚟講,係一個好好情感嘅出口,幫我抒發感情。

「我大部份嘅靈感,好多嚟自自己嘅親身經歷,或者電影;我有一個小小嘅習慣,當自己冇乜靈感,唔知寫咩嘅時候,我會喺Youtube開啲短片,或者一啲自己喜歡嘅電影,睇咗畫面一路寫,好多時會因為有一種感覺想capture,所以我寫歌,好少係行行吓街諗到啲melody,我會係為咗一件事,或者一個感覺去寫。」

雖然AGA係土生土長嘅香港人,但佢嘅混血兒身份,不時予人「鬼鬼哋」嘅感覺,不過佢喺飲食上嘅口味,就話俾大家知,自己係不折不扣嘅香港人。

「我好鍾意食雞煲,仲因為雞煲而愈嚟愈食得辣,舒文話好多artist都會因為年資而食得辣咗,唔知係咪真o架呢?」

AGA嘅師父舒文(左一)係佢嘅「雞煲腳」之一,原本唔嗜辣嘅佢,敵不過美味誘惑,

 

講到keep fit,AGA(後右)喺跑步上絕不偷懶,飯敍前一晚佢先跑咗7km。

 

煙燻BB豬肋骨($188),淡淡嘅煙燻香,令食慾大增。

 

慢煮安格斯牛面頰($248),經過慢煮嘅牛面頰,有入口即溶嘅質感。

 

以法式燉蛋($68)作甜品,香脆嘅焦糖下為軟滑嘅燉蛋,甜度適中,係完美句號。

 

F Word
地址:中環伊利近街38號地下
電話:26506667