十四鄉發展項目擴大　新地投放逾億元搞基建

新地上周向城規會申請將發展密度提高，加建近百萬呎樓面，住宅伙數由四千九百三十伙大增逾九成至九千五百伙，單位面積就由約千呎，減至平均只有六百幾方呎，取消所有洋房單位，轉攻中小型設計。消息人士透露，政府對擴大十四鄉發展規模持開放態度，「政府設定私人住宅每年落成量目標係一萬八千個，十四鄉加大供應量至九千幾伙，相等於政府全年目標嘅一半，樂見市場供應增加。」

新地方面話，係考慮到因應時代發展趨勢申請修訂計劃，多咗供應，對望上車嘅人來講，自然係好事。

有地區消息人士關注配套問題，「項目面積等於四個維園，伙數相當於兩個珀麗灣，一下子有成兩萬幾人搬入來，交通、排污、社區設施應唔應付到？」

據了解，新地曾跟地區唔同持份者傾過，審慎評估新增居住人口對交通流量的影響，會放逾億元搞好項目基建，包括擴闊西沙路變成雙線雙程行車，以應府增加的交通流量，「其實嗰度塞車，好多時係因為巴士埋站，因為係單線行駛，所以後面啲車要跟住停，變成雙線後相信解決到呢個情況。」此外，再配合新的交匯處，應可配套多條公共交通路線，不會增加道路交通負荷。

其他基建項目包括興建排污系統改善污水排放等。此外新起嘅康樂運動中心雖然喺地界之內，但設施將畀公眾使用；而發展項目亦已預留位置作興建兩間小學用途。即係話，十年八載之後，十四鄉會變成一個年輕市鎮。

新地有意將十四鄉項目發展為年輕新市鎮，對於上車嘅人來講，增加供應自然係好事。

新地以往部分樓盤以大單位做賣點，但今次十四鄉項目平均面積或減至幾百平方呎，適合更多上車人士。

十四鄉項目係新地大型發展項目之一，舊年九月至完成超逾一百五十億元補地價。