為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 07 月 31 日

關慧玲

《東周刊》社長兼總編輯。

神秘博物館

去赤柱一行,懲教署署長林國良熱烈推介去行吓懲教博物館。懲教博物館在東頭灣道,監獄旁邊,可能地點略偏遠以致較少人注意,不過散開步行過去也不難,佢共有十間展覽室,一座模擬絞刑台(圖1)和兩間模擬囚室,藏品有六百多樣,包括歷年懲教署職員制服(圖2),相當豐富,見證一百七十年懲教制度變遷,當係上了一課香港歷史亦無不可。

 

 

 

 

最吸眼球的,是像真度極高的絞刑刑具。粗如女士手腕的繩索懸吊在粗大橫樑上,當年的監獄署職員(懲教署前身)需要量度死囚的身高和重量,去決定套在他們頸項項圈大小和繩子的長度,稱之為「度頸」。所以上一代的人成日話慘過「度頸」,就係形容死到臨頭,死都無咁慘咁解。可能當日參觀時無乜人,都睇到有些心寒。香港最後一次執行絞刑喺一九六六年,而絞刑喺一九九三年被廢除,「度頸」呢個廣東話亦隨之無人再講嘞。

另一套「堅嘢」係笞刑刑具,百幾年前笞刑係在獄中使用的體罰方式,受刑者會一個「大」字型咁被綁在刑架上,刑具即係藤條有唔同粗度,諗起都相當嚇人。不過喺政府仲未廢除以體罰作為刑罰之前,監獄內早已禁止用笞刑去處罰違反紀律嘅囚犯。今日懲教制度早已進化成「懲」與「教」,對青少年尤其更着重更生,罪與罰的年代已過去了。

其他看頭仲有,懲教署在一九七八年至一九九八年管理越南船民營時,營內船民的生活和騷亂百態。在那個特定時空下,懲教署人員和船民之間常處於緊張的狀態,而船民之間亦多打鬥,所以有船民會自製武器,包括削尖嘅鐵支及其他利器。展覽室亦展出監獄中搜出的違禁品,包括小鐵片,收藏在鞋內或書本內,以備不時之需;仲有自製麻雀等賭具,這些都是懲教署人員頻密巡邏搜出來的,可以想像當年真係睇少一刻都會出事。

至於附設嘅社區教育中心喺七月初經翻新後重新開幕,公眾人士可透過互動及有趣的形式,認識懲教工作及危險藥物帶來的嚴重後果。

想不到佢館仔細細卻好多嘢睇,記著佢係星期一休館的,其他時候行開赤柱的話,值得一行。