鄭融趕去撲水
近排忙住宣傳新歌嘅鄭融，日前，就畀東姑巧遇佢一個人去中環行街。一頭金髮，襯咗一套白色灰波點嘅外套同埋短裙，呢身「乳牛look」好鬼搶眼！
東姑見佢由一個商場，快步穿去另一個商場，行色匆匆，最後去咗一棟銀行大廈，似係趕住去處理一啲財務問題。隔咗大概半個鐘後，再見佢由銀行離開，面口比佢入銀行之前變得寬容晒，仲當街企喺度講電話，兼露出「蓮子蓉」咁嘅笑容，睇嚟佢喺銀行搞錢銀嘅嘢，搞得好順利。
後來，當鄭融發現咗東姑，就即刻戴番黑超遮住佢嘅素顏，又笑笑口表示啱啱喺銀行搞完轉帳嘅嘢，然後，就同東姑say goodbye離開喇！
行色匆匆嘅鄭融，快步趕去一間銀行，似係好急處理一啲財務事宜。
離開銀行之後，鄭融變晒「蓮子蓉」嘅面口，企喺人來人往嘅街度講電話。
佢成身「乳牛look」嘅衣着打扮，相當之搶眼，不過就素顏冇化妝，當見到東姑時，仲即刻戴番副黑超遮樣。
