為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 07 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

星星造星

雖然近年K-Pop熱潮席捲全球,但係香港梗係要有屬於香港人嘅Super Star!全新電視節目《Good Night Show全民造星》,就請嚟星級導師,以99選1形式,全方位打造新世代嘅Hong Kong Super Star。

今次「Paco巨星飯堂」,邀請咗其中五位星級導師:Eric Kwok、Sunny Wong、導演火火、劉美君(Prudence)同側田,去到位於尖沙咀嘅「Mr. Korean BBQ」,品嘗正宗韓國燒烤同特色菜式,揭開「造星」背後嘅心情同苦心。

平時見Eric、火火、Prudence、Sunny同阿田,各自喺歌、影、視、舞界中獨當一面,喺ViuTV新節目《Good Night Show全民造星》中,佢哋就親自教授有心喺娛樂圈發展嘅參賽者,打造屬於香港人嘅新星。

 

由零開始

巨星嘅誕生,並唔係一朝一夕,要配合天時地利人和外,仲要粒「星」要有無限潛能,節目請嚟咁多位星級導師,分兩組激發一眾潛在「巨星」嘅能力,令佢哋身心都ready。
已經貴為影后嘅Prudence,唱功同演技都一樣出眾,但面對九十九位參賽者,佢都有頭痛嘅時候。「佢哋全部由零開始,雖然有啲參賽者都做過吓model,但講到『星』,佢哋都唔達標。我覺得我哋作為導師,喺教佢哋嘅同時,調整佢哋嘅心態先係最重要。

「可能因為比賽模式嘅關係,佢哋只係集中一round,呢個round唔得就下一round,俾我嘅感覺好hea住做,咁樣真係冇可能last得耐。」

負責舞蹈方面嘅,係極度資深嘅Sunny,佢話:「佢哋仲要啲時間去做,跳舞叫做好啲嘅,其他方面就比較弱,唱歌唱得唔錯嘅,跳舞就仲要下啲苦功。」

同Prudence、Sunny一組嘅火火就表示:「比賽模式冇得變,就要鬧醒佢哋!(Paco:「有冇邊啲參賽者令你想搵佢哋演出你嘅戲?」)嘩!講到呢個話題,我要飲啖水先!(大口呷水後決絕答)冇!見到佢哋我就諗起,Paco你以前點樣同我講,叫我keep住心入面嗰團火,佢哋就係未有嗰團火,所以我哋嘅角色,就係打火機。」

我帶五位嘉賓,去到位於尖沙咀嘅「Mr. Korean BBQ」,品嘗正宗韓國燒烤同特色菜式,揭開「造星」背後嘅心情同苦心。

 

節目共有十名導師,(左起)馬天佑、Sunny、CM、火火、Prudence、Eric、卓韻芝、麥秋成、Felix Wong及阿田,由唱歌、舞蹈、形象到演技都兼顧到。

 

醬油蟹($300/兩隻),蟹來自南北韓交界嘅水域,夠晒特色,再以秘方汁料醃製四日,係誠意同心機嘅結晶。

 

特級牛肋肉($208/例),脂肪同肉分布均勻,為舌頭帶嚟無盡享受。

 

醃製辣三花肉($108/例),以秘製醬汁醃製嘅三花肉,更見惹味。

 

失控爆喊

聽到火火嘅意見,另一組嘅星級導師阿田說:「我見到啲囝囝,都會諗起Paco你話簽我嗰時嘅情形。當時我話自己只係識唱歌,拍戲我唔得,亦都冇人會搵我拍廣告⋯⋯但係你俾咗好大信心我,我想做你當日做嘅角色,俾信心啲囝囝,令佢哋之後可以獨當一面。」

Eric就話:「咁佢哋仲有好大段路要行,o依家好似Prudence咁講,要調整到佢哋嘅心態先,機會只係留俾有準備嘅人,人哋成功有血有汗,佢哋就係咁爆喊,咩男兒有淚不輕彈,佢哋冇o架!集集都喊(側田:「係喎,都唔明佢哋為乜喊。」),咁都幾真實嘅。」

而暫時令佢哋留下深刻印象嘅,阿田同Prudence都欣賞其中叫「肥仔」嘅參賽者,仲讚佢嘅態度可嘉添!

Eric同阿田係同組嘅星級導師,過程中仲勾起後者做新人嘅回憶,令佢更加投入。

 

要喺九十九名參賽者中,經過星級導師同評判嘅重重關卡,脫穎而出,真係少啲實力同鬥心都唔得。前左三為深得Prudence同阿田歡心嘅參賽者「肥仔」梁業。

 

參賽者面試期間,喺另一房內觀察嘅導師們一臉凝重,又埋頭drop notes,就知「造星」需要佢哋付出唔少心血。

 

部隊鍋($218/例)足料炮製,配上餐廳秘製嘅醬料,同韓式即食麵,係我嘅favourite!

 

三花肉($108/例),選用美國豬肉,脂肪同肉比例1:1,只要燒得香脆,就唔停得口。

 

豬皮($75/例)燒過後,既香口又煙韌,屬佐酒佳品。

 

最Fit嫲嫲

講培訓參賽者,Prudence愛之深責之切,一絲不苟;一講到keep fit,已為人嫲嫲嘅佢,都係完全唔鬆懈,日日都做運動外,佢話:「Lunch我食得好豐富,通常都係牛扒,燒嘅仲係我嘅favourite!不過我只係食organic嘅肉。到晚餐就通常食沙律,以菜為主,配合埋做運動就OK。」

今次食韓國燒肉,就啱晒火火口味。「識我嘅人都知,我最鍾意食燒肉,一個月我起碼食三、四餐!」

人夫Eric嘅音樂才華,唔使我多介紹,但係佢嘅烹飪天份,就鮮為人知。「我鍾意食炒飯,我嘅拿手菜都係炒飯,叫『女人炒飯』,係我喺太太打牌嘅時候,煮俾佢同佢啲閨密食嘅。材料好簡單,切啲薑粒、蒜粒,落啲帶子同調味就搞掂,啲女人好鍾意食,但係男嘅就麻麻哋,所以先叫『女人炒飯』。」

另一組有火火、Prudence同Sunny,前兩者係嚴師代表,要鬧出參賽者心裏面嗰團火。

 

Prudence為人嫲嫲已久,但係佢keep住做運動,身型比唔少年輕人更fit。

 

生牛肉韓式石頭飯($128),生牛肉拌勻配菜及飯,味道一絕。

 

原味牛肋骨($238/例),選用美國出品,經燒烤後肉質仍保持嫩滑。

 

Mr. Korean BBQ
地址:尖沙咀柯士甸道140-142號瑞信集團大廈1樓
電話:29076678