為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 07 月 28 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

淺談ETF

去年應邀為香港投資者教育中心擔任大使,當時中心舉辦理財月,期間我喺兩個投資講座上同公眾投資者交流。從投資者提問以及我一直同股民嘅溝通,發覺投資者除咗一般股票,對於ETF產品都有涉獵。

我就借呢個欄講下ETF,亦都賣下廣告,介紹大家上中心嘅「錢家有道」網頁睇相關資料。ETF即係「交易所買賣基金」,係獲得證監會認可,喺交易所買賣嘅基金。ETF畀投資者可以間接參與其他市場,亦毋須實際持有指數成分股,就可以收取模擬指數表現嘅回報。

全球第一隻ETF在一九九三年喺美國誕生,至於香港幾時至有?可能大家仲記得,一九九七年亞洲金融風暴導致港股大跌,港府入市大量買入恒指成分股以穩定市場,所買股份佔當時總市值百分之七。金融危機後,政府要將所持股份有秩序咁賣出,減少對市場嘅衝擊,因此在一九九九年誕生咗香港首隻ETF盈富基金。

二○一八年首三個月,ETF平均每日成交額五十八億元,比去年同期上升三成二。ETF買賣同股票一樣,比較方便,而且管理費一般較低,因此見得到有一定投資者參與。現時有超過一百隻ETF喺香港交易所上市,過去十年香港ETF市場按資產管理規模計增加逾三倍。

ETF跟蹤、模擬或者對應某一指數而投資於一籃子股票,比較適合對某板塊有信心但唔知點揀個股,或者唔想貿然高追當中龍頭股嘅投資者。好似六月剛推出嘅三星中國龍網(2812),就追蹤全球上市三十間最大中國互聯網公司。呢隻ETF完全複製中證全球中國互聯網指數,所投資公司需已上市超過三個月或IPO規模超過一百億美元,能夠反映中國大型互聯網企業嘅整體走勢。

基金既包括中國三大互聯網巨頭阿里巴巴、百度和騰訊,亦有閱文、愛奇藝等潛力新股。不過,現時主要互聯網公司仍以美國為首,點解選擇喺呢個時間投資於中國?三星資產運用(香港)ETF主管張嘉敏同我分析,中國實質已經成為推動全球互聯網產業嘅重要力量。例如網絡購物嘅發展,令中國現時佔全球電子商務交易百分之四十二,處理移動支付比美國多十一倍,亦擁有超過三分之一全球市值最大獨角獸公司。

中國互聯網產業嘅增長動力,仲來自網絡教育行業、線上旅遊市場、網絡廣告(包括社交媒體和視頻媒體),以及手機遊戲帶動嘅網絡遊戲市場等。相關股份有京東、網易、攜程旅行網、好未來等。假如互聯網產業係新經濟下嘅新霸權,咁可以見到美國公司獨霸市場嘅情況已經改變,新「權力遊戲」之下中國互聯網公司正逐步趕上。可以預見投資者對於中國互聯網產業將日趨注視,而相關ETF不失為上車選擇。

不過,投資者要注意,ETF同股票一樣都有升跌風險,仲要留意ETF跟蹤乜嘢指數,有乜嘢成分股,基金規模幾大,同埋基金係實物ETF(持有成分股)定係合成ETF(透過衍生工具去複製組合)。以上都係「淺談」,要「錢談」就要自己做足功課!

有證券行推出追蹤三十間最大中國互聯網的ETF,其中包括沒有在香港上市的阿里巴巴等。