為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 07 月 17 日

關慧玲

《東周刊》社長兼總編輯。

狀元是如何打造出來的

上星期文憑試放榜,又係狀元出爐之時(圖)朋友女兒係本屆狀元之一,考到極佳成績。筆者恭喜佢之餘,順道攞貼士,請教佢點教出個叻女。佢話要考好成績,離不開「勤力」兩個字。以往有些考生話備戰期間可以打機;偶然輕鬆吓就得,如果話日日都可以打機,千祈咪當係真呀。

 

 

以佢從旁觀察,女兒由中五開始備戰,將要考嘅幾科分階段溫習,務要在考試前各科都可由頭到尾溫習幾次。

其次就是操卷,仲係操足以往二、三十年嘅試卷,「考試係技巧,熟能生巧係一定嘅。不過攞到5*定5**,有時可能係一兩條選擇題嘅分別。個女在練習一份九十年代試題時,答過一條長問題,跟今屆某條選擇題好似,佢話如果無操過嗰條長問題,呢條選擇題就會答錯。」

筆者問,考生以萬計,個個都會操卷,狀元卻是鳳毛麟角,究竟突圍的秘密在哪裏?這位家長笑說了一個「可能只有我係咁做」嘅理論,就是放手讓女兒學習自律;自律性高,才是致勝關鍵。佢話個女早起晚睡,上課以外就是坐在書檯前溫習,睡得不多但很有規律,玩得非常少。

自律性點樣練番來?佢話夫婦倆採取從旁指引的方法,好少直接幫女兒做功課,除非女兒主動開口,否則唔會幫她溫習考試,等她自己來,「她小學時成績在中游,上了中學才考第一。」

他記得女兒還小時,帶她參加一項戶外活動,「有個射擊遊戲,有位母親和兒子正在玩,小朋友射了幾次唔中,那位母親即說呢個唔好玩,去玩第二啲,就把兒子拉走了。」呢位父親相信從挫折、逆境中學習的道理,如果從來都不讓子女嘗試失敗,哪裏懂得反思和改進?樣樣都替他選擇了,會得到兩個效果:一是習慣了依賴,一旦要自己來就不懂做;二是愈以一己之好惡去催谷,小朋友愈易厭惡學習,因為驚咗。

不過,這位狀元家長亦慨歎,說得容易做時都唔簡單,要忍得手畀佢哋犯錯,佢哋唔想再錯就練習到自律:「現代父母好忙,捉住仔女隻手做當然快靚正,但小朋友就失掉了學習的過程,也不曉得面對失敗和不完美。」

說到底,各家長都有不同嘅教仔經,呢位狀元家長咁樣教,其實是他根本沒預算過谷個女做狀元,「她小學時一放學回家就玩,喜歡游水彈琴就讓她學,學到無興趣就停。中學唔想佢在太催谷嘅環境,所以無入傳統名校,o依家考到好成績,唔知係咪印證咗我嘅教仔理論正確?」

不過最重要一點,係呢位家長兩夫婦都係聰明人,試問佢個女又點可能遺傳唔到佢兩個嘅基因?