為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 07 月 22 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

善心惠眼

為社會服務,從來唔係靠把口,真正身體力行嘅善長,應屆保良局主席蔡李惠莉,必定為當中不遺餘力嘅代表人物。從事教育界多年嘅蔡太,向來為善都不甘後人,如今做埋保良局主席,更加事事上心。

今次「Paco巨星飯堂」,我就誠邀蔡太,去到位於利園嘅「颱風」,品嘗特色嘅中菜、點心,細說佢喺行善、教育上嘅大計。

本已忙於教育事務嘅蔡太,行善不遺餘力,今年兼任保良局主席,身體力行為善事出力,任重道遠。

 

致力行善

身為「玩具大王」蔡志明的太太,蔡李惠莉係別人眼中嘅名媛闊太,但佢對交際應酬嘅生活,並唔熱衷。反而對教育同行善,佢就相當投入,「保良局服務咗香港一百四十年,已經載滿經典,嚟緊會繼續喺經典中,創造更多提升效能嘅服務模式,募集更多資源同人才,同善用資源,發展貼近現時需要嘅新項目。

「好似善用專上教育經驗,為社會培訓一啲o依家好短缺嘅醫療、護理等專門職系人才。呢啲係計劃中,優先實行嘅項目。」

蔡太榮升主席,喺佢就職當日,蔡家總動員出席支持,「我好多謝家人支持,好開心,我已經喺保良十年,覺得好有意義,遲啲都會俾啲孫一齊行善。」

對於丈夫表示會隨傳隨到,仲話:「叫我去邊、乜都去,我已經預晒啲時間俾太太,要錢就攞錢。」蔡太就話:「唔使傳都要到啦!今年家人好支持,我個仔加讚就有份贊助嚟緊嘅戲曲音樂劇《一代天嬌》,首場演出係保良局慈善場,到時必定係舉家捧場,我都好期待,係擔心手上唔夠飛啫。」

我帶蔡太去到位於利園嘅「颱風」,品嘗特色嘅中菜、點心,細說佢喺行善、教育上嘅大計。

 

蔡太今年接任保良局主席,就任當日,「玩具大王」蔡志明,與二人的子女及女婿、媳婦都出席儀式,以表支持。

 

松露天鵝酥($38、前)於傳统芋角加上天鵝頭裝飾,內餡加入黑松露醬及鵝肝,香氣撲鼻。 潮式三弄($38、後右),則展現中西合璧,白色為原味,橙色為麻辣,綠色為黑松露。 甘筍鹹水角($38、後左),鹹水角轉上甘筍外形,增加食慾。

 

松葉炸蟹鉗($48),用松葉蟹鉗取代傳统花蟹,肉厚味鮮,蝦膠加入墨魚及赤蝦膠,更加爽口。

 

椰皇燉蟲草花烏雞湯($88),以慢火燉十二小時,並用椰皇提鮮,口味清新不膩。

 

春風化雨

行善以外,蔡太對教育界作出極大貢獻,佢一手創辦嘅安基司幼稚園暨國際幼兒園,係本港首間推行美式啟發潛能教育方法嘅學校。蔡太喺辦學過程中,面對唔少挑戰,不過佢仍然樂在其中。

「辦學並非為咗賺錢,而係為理想。每天我睇到一班活潑可愛嘅小朋友,就會覺得好開心,心裏面嘅煩惱都一掃而空!幼稚園係小朋友第一個學習嘅地方,對佢哋嘅成長好重要,我希望佢哋能夠喺輕鬆嘅環境中學習,令佢哋享受返學嘅樂趣。」

辦學嘅同時,蔡太喺培育子女都甚有心得。佢同丈夫育有數名子女:大女蔡加敏係旭日集團副主席、蔡加怡係香港最年輕嘅上市公司女主席;兒子蔡加讚則係最年輕嘅政協常委及鐘錶集團主席,都係優秀嘅人才。

「我自小就向子女灌輸中國嘅道德文化,教佢哋點樣以品德立人。我都好重視同佢哋嘅相處時間,無論幼稚園嘅工作有幾繁忙,我都唔會忘記媽媽嘅身份同責任,要為家人擠出一定嘅時間。我將星期日定為家庭日,全家歡聚一堂,一齊傾偈溝通,互相關心。」

蔡太表示,保良局服務香港已一百四十載,

 

上月蔡太粉墨登場,為保良局慈善粵劇晚會《紅絲錯配》演出,子女跟外孫也現身支持。左起為蔡加讚及太太汪圓圓、蔡加怡及丈夫陳漢驄、蔡加敏及一對子女。

 

蔡太(左二)從事教育界多年,早前保良局跟雲南省簽署合作協議,六所屬校與當地五所中小學結為姊妹校,佢就以主席身份,與總理鄧宣宏雁(右一),一起見證呢個歷史性時刻。

 

特色胡椒海蝦($168),將胡椒炒香,再放入蝦以慢火炒熟,極考厨師手藝。

 

菠蘿生炒骨($88),酸甜味道配合得宜,外脆內juicy。

 

上湯金魚餃($48),金魚眼睛以食用金粉裝飾,貴氣又像真。以鮮蝦、帶子及甘荀等材料製餡,釀於晶瑩剔透嘅餃皮內,味道清爽香甜。

 

弄孫為樂

講到八個孫仔、孫女,蔡太更加喜上眉梢,上個月父親節,佢話:「啲仔女知爸爸做嘢忙,冇時間買衫,所以每年父親節同蔡生生日,佢哋都預早買咗大量西裝同運動裝做禮物,對爸爸嘅size已經熟晒。

「其實禮物係其次,我見到八個孫已經好開心,心都甜晒。但係再多啲孫仔就太辛苦嘞!我都唔好意思再叫啲仔女追,佢哋每人都有幾個小朋友,已經好忙嘞!不過我都有想過八個(孫)好意頭、九個就長長久久、十個就十全十美⋯⋯o依家孫仔、孫女都有,我已經很滿足,尤其係見到佢哋一齊玩捉迷藏,成個畫面都好可愛。」

除保良局公職外,蔡太任香港女童軍總會副會長多年,努力推廣女童軍運動。

 

已有八名孫仔、孫女嘅蔡太,表示相當滿足,圖為佢跟外孫女馬靄翹於錄音室充當DJ,而女兒加敏就為佢哋影相留念。

 

颱風蔥油雞($138),選用本地農場雞,皮薄脂肪少,雞味濃郁。每日以上湯浸製,肉質嫩滑。

 

安安芝麻包($38、後左),依照傳統以芝麻蓉作餡,面層以竹灰粉搓製成熊貓五官,趣致可愛。颱風流沙包($38、後右),以黃色和白色麵團疊起,再切開搓製,造出龍捲風狀嘅漩渦條紋,極考功夫。棉花糖白兔仔($32、前),甜而不膩。

 

颱風
地址:銅鑼灣希慎道33號利園1期4樓401號舖
電話:35946308