為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 07 月 16 日

曾江情侶裝放閃

八十三歲嘅曾江(Ken哥)同七十五歲嘅焦姣,結婚二十四年,兩個人老夫老妻,平時出街都經常「快慢咇」,一個行先,一個行後。皆因Ken哥隻腳唔多好,有啲啲行動不便,而老婆焦姣好多時蹺埋手,佢有佢自己一支箭咁行頭。

不過,東姑日前就喺九龍城再遇佢兩公婆,今次竟然出奇咁合拍喎。焦姣終於肯放慢步伐,就番撐住拐杖嘅Ken哥,同佢並肩而行;而最神奇係兩個都幾廿歲人,呢日仲襯埋情侶裝出街。當日,佢哋着埋差唔多同款圖案嘅上衣,離到遠遠都畀人知道佢哋係一對。雖然夫妻相依白頭到老,恩愛唔使表現畀人睇,但間唔中「低調得嚟高調」,「放閃」一吓,都不失為情趣嘅一種!

講開又講,有傳因為拍無綫節目《4個小生去旅行》,Ken哥同謝賢(四哥)積怨。當年,喺節目記招上,四哥仲當眾出手掌摑Ken哥。日前,四哥突然自爆同Ken哥其實好friend,嗰日只不過係夾埋做戲,為節目宣傳喎。而且,四哥仲講笑話自己蠢,畀人擺上枱做摑人嗰個,摑嗰時好威好過癮,到後尾先知道慘,因為個個指住佢嚟鬧,自歎好陰功咁話!

之但係,四哥講嘢冇句真,呢個講法令好多人仲係半信半疑,唔知Ken哥幾時出嚟講兩句,等大家可以破解呢個謎團呢?

Ken哥同太太焦姣,都係着咗一件差唔多圖案顏色嘅上衣,襯埋似情侶裝。

 

平時老婆行路快似箭,唔會等埋Ken哥,但呢日焦姣就放慢咗腳步,同撐住拐杖嘅老公並肩而行。

 

現年八十三歲嘅曾江同七十五歲嘅焦姣,唔經唔覺原來已經結咗婚二十四年,認真係老夫老妻。

 

一五年,四哥、Ken哥、修哥同Joe Junior,一齊去俄羅斯拍攝無綫節目《4個小生去旅行》,節目入面四哥同Ken哥仲係好老友鬼鬼。

 

當日記者會,四哥出手掌摑Ken哥充滿火藥味,胡楓(修哥)仲做和事佬幫Ken哥擋咗一巴,搞到眼鏡都飛甩。

 

日前,四哥突爆內幕,否認同Ken哥不和,仲話當日嘅摑人事件係做戲喎。