謝雪心有廿四孝老公
一代粵劇名旦、六十四歲嘅老戲骨謝雪心（心姐），最近喺無綫劇集《宮心計2深宮計》中飾演嘅章尚宮，收埋唔少宮中嘅秘密，演技爐火純青，令觀眾都嘆為觀止。
早前，心姐出嚟為《宮》劇做宣傳，東姑就發現同佢結咗婚四十四年嘅老公陳啟亨，都有現身撐老婆嘅場，仲全程離遠默默支持心姐，走嗰時更加做埋心姐嘅「柴可夫」，認真廿四孝喇！
據知，心姐當年廿歲就結婚組織家庭，甘願喺黃金期退出粵劇界，留喺屋企相夫教女。o依家做生意嘅老公搵夠退休，就輪到老公做番佢背後嘅男人，所以話幸福其實係修來嘅福氣，真係各有前因莫羨人喇！
喺台上，心姐同馬國明又攬又錫為《宮》劇宣傳，佢哋情同母子嘅親密舉動，當然無懼心姐老公會詐型。
忙住宣傳兼要同其他演員應酬聚舊嘅心姐，不時都會冷落咗老公。
心姐老公陳啟亨到場幫老婆撐場，通常都會低調咁坐埋一邊，注視心姐嘅一舉一動。
廿四孝老公陳啟亨真係冇得頂，全程行行企企，耐心咁等心姐做完嘢，再車佢返屋企。
