為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 07 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

光影新勢力

香港電影求才若渴,有實力嘅新人,自然多機會發揮。憑舞台劇嘅精湛演技,令人留下深刻印象嘅韋羅莎(Rosa),同今年有份角逐金像獎「最佳新演員」嘅梁雍婷(Rachel),最近就成為咗同門師姐妹,與佢哋同門嘅,仲有喺《點五步》有搶鏡演出嘅柯煒林(Will)同黃定謙(Himmy),及編導演俱佳嘅陳健朗,準備喺影視圈大展拳腳。

今次「Paco巨星飯堂」,我就帶五位嘉賓,去到位於尖沙咀嘅「Ssal Bori Ssal」,品嘗特色嘅韓國料理,細說希望藉光影留名嘅夢想。

五位新晉演員(左起)柯煒林、黃定謙、韋羅莎、陳健朗及梁雍婷,齊齊做足準備,於影圈大展拳腳。

 

跟影帝鬥戲

繼去年同影帝秋生、名嘴阿Jan合演舞台劇《搞大電影》,Rosa喺簽咗新經理人公司「Blacklight」後,就接拍麥浚龍執導嘅電影《風林火山》,同劉青雲、古天樂、梁家輝等影帝合作。佢話:「最難忘的,是可以和幾位影帝合作,心情非常緊張。我同梁家輝最多對手戲,其中一場戲,他要在我的臉上鎅一刀,他真的是一位『暖爸』,過程中非常小心、好照顧我,因為佢話女仔要小心塊臉,唔可以真係傷到。我作為一個新演員,可以得到家輝哥這樣照顧,真係好感動!」

另一位女將Rachel,喺《藍天白雲》嘅表現一鳴驚人,嚟緊都有新作面世。「我最近啱啱拍完港台嘅單元劇《火速救兵IV》,我喺入面飾演救護員;仲有電影《再見UFO》,同Shine嘅黃又南合作,飾演佢嘅女朋友。兩者係分別很大嘅角色,所以我期待自己可以繼續喺演戲路上面,作多元化嘅演出同嘗試。除咗演戲,我一直都有自己去學結他、唱歌同Rap,希望觀眾可以認識《藍天白雲》以外嘅我。」

我帶五位年輕人,到尖沙咀品嘗特色韓國菜,聽聽他們的理想和人生願望。

 

紫菜飯團(上,$50)和辣雞腳(下,$110),最地道的韓式風味。

 

牛蒡根薄餅($80),簡單美味。

 

韓式豬手拼五花腩($290),乃喜愛食肉者的必試選擇。

 

期待代表作

有份演出好評如潮嘅《點五步》,阿Will同Himmy都有一個完美起步點,o依家係拓展「業務」嘅好timing。阿Will稱:「我之前試過大半年無嘢做,但係簽咗公司呢半年,工作嘅時間比休息多,係一件好幸福的事。最近拍多咗廣告同MV,啱啱喺馬來西亞拍完鬼片返嚟,嚟緊仲會有兩三部戲有份參演,係簽公司前意料唔到。」

Himmy就表示:「我希望可以演更多嘅戲,之前拍咗兩部電影,一部係《淪落人》,我飾演黃秋生個仔;另一部係《一級指控》,飾演鮑起靜個孫,兩個角色對於套戲都好重要,仲有唔少戲份。我期望可以憑呢兩套戲,競逐下年香港電影金像獎嘅新人提名啦!」

而阿朗就作編、導、演三線發展,佢嘅作品《手捲烟》贏得今年「首部劇情電影計劃」,佢仲會親自執導。「我希望可以作導演、演員雙線發展,好似北野武同奇連伊士活咁。o依家我導演嘅戲只係籌備階段,所以月中我會先參演另一部電影《喜歡你是你》。」

韋羅莎和梁雍婷,各自有機會參予電影演出,與前輩合作獲益良多。

 

Rachel於《藍天白雲》嘅出色表現,為佢帶嚟金像獎「最佳新演員」提名,對佢喺演藝界發展,無疑係一支強心針。

 

早已藉着舞台劇發揮演技嘅Rosa,喺即將上映、由Juno執導嘅《風林火山》中,同影帝級人馬青雲、古天樂同梁家輝等同場較技,令人期待。

 

辣海鮮魚糕湯($198),超級惹味!

 

海鮮薄餅($129),香氣四溢令人食慾大增。

 

型男做廚神

除咗演藝事業,原來阿朗同阿Will喺廚藝上,都有自己嘅recipe,睇得演得外,男士煮得,真係會更易令自己加分。阿朗話:「我擅長煮西式嘅菜式多啲,好似意粉、焗大蝦都OK嘅,特別啲嘅可能係Bailey's煮青口,中菜我就唔係好識煮。」

阿Will就表示:「下廚最緊要係食材新鮮,咁樣點煮都唔會差得去邊。我最近煮嘅拿手小菜,係蠔仔炊飯,所以啲蠔一定要新鮮!」

兩位型男講得興起,Rachel嚟一個反高潮:「我記得有一次我妹妹想食炒蛋,我潛意識就攞咗水當油,然後煮咗水炒蛋⋯⋯因為我平時好少用油煮嘢,多數只係烚嚟食o架咋。」

(左起)陳健朗、黃定謙及柯煒林,各自在娛樂圈都有不同的發展方向。

 

阿Will(左圖下)喺viuTV劇集《VR驅魔人》中,有出色演出,相信嚟緊仲有大把發展空間。

 

雖然廿三歲嘅Himmy嘅新作《一級指控》尚未上映,但戲中飾演鮑姐鮑起靜孫兒嘅佢,已表示希望可憑演出,角逐來屆金像獎「最佳新演員」,鬥志滿分。

 

牛肉三重奏($420),品嘗韓式牛肉風味。

 

芝士粟米炸雞($185),香口兼脆口,且大大碟,足夠與好友分甘同味。

 

Ssal Bori Ssal
地址:尖沙咀金巴利道78號金輝閣地下B舖
電話:27368444

 

Rachel髮型credit: Oscar Ngan@ii Alchemy