陶大宇《刑》劇好帶挈

最近喺午夜時段，無綫重播廿幾年前嘅經典劇《刑事偵緝檔案》系列，搞到大家又有無限集體回憶。當年飾演沙展嘅陶大宇同飾演記者郭可盈，更因為呢套劇成為一代經典熒幕情侶。東姑捱眼瞓都要追睇，雖然劇情有啲牽強，啲兇手永遠都會好輕佻咁，自己講出殺人嘅經過，但係劇情緊湊，亦都係大家追睇嘅原因。

日前，劇集嘅監製潘嘉德，吹雞搞咗個台前幕後重聚嘅飯局，大批劇集演員包括：陶大宇、郭可盈、郭藹明、鍾麗淇、佘詩曼、周家怡、馬德鐘、郭政鴻、海俊傑、陳美琪、向海嵐等等，都有出席，好鬼熱鬧！

講起陶大宇，當年真係紅極一時，可惜因為緋聞，最尾仲搞到離婚，演藝事業亦不復當年勇。最近因為《刑》劇嘅帶挈，令到佢喺內地又再度火熱，廣告、登台、商演接到手軟。早前，佢又去咗東莞登台，而當地粉絲嘅熱情，真係群情洶湧，唔講得笑，令台上嘅陶大宇好有超級巨星feel。之不過，歲月不饒人，近睇這名現年五十四歲的「師奶殺手」真係殘咗唔少，係時候好好休養生息一下先得啦！

日前嘅《刑》劇飯局照流出，各位網友都大讚，同陶大宇發生三角戀嘅兩位女主角：郭可盈與郭藹明，皆保養得好好。

陶大宇好識搞氣氛，令現場嘅觀眾玩得非常興奮。

呢張海報依舊以陶大宇係「師奶殺手」作招徠。

離開東莞前，陶大宇亦都好識做人，捉住搞手影番張自拍照。

 

日前嘅《刑》劇飯局照流出，各位網友都大讚，同陶大宇發生三角戀嘅兩位女主角：郭可盈與郭藹明，皆保養得好好。