何啟南平易近人

今年五十一歲嘅無綫「反派王」何啟南，經常被派演奸角，好似熱播處境劇《愛•回家之開心速遞》入面，佢就飾演奸詐嘅法律部主管John，靠奸招上位之餘，仲同「細龍太」Jenny（陳偉琪飾）有婚外情。不過，何啟南私底下係個幾好嘅男人，去年同拍拖三年幾嘅圈外女友楊穎靜結婚，過住幸福嘅二人世界。

早前，東姑就喺銅鑼灣撞到何啟南，發現平日嘅佢，好陽光、好親切，一啲都唔似拍劇時咁霸氣同奸狡。當日見佢戴咗眼鏡、孭住背囊，耳仔塞住耳筒，邊行邊聽歌，一路行仲一路咪咪嘴咁笑，感覺好和藹可親、平易近人。後來，佢上咗一棟商業大廈，估計係做嘢，落樓時有一男一女工作人員同行，三個人仲企街吹水傾到唔願走。睇佢唔出，何啟南原來係咁好相與，又咁健談，真係人不可以貌相喇！

戴咗眼鏡、孭住背囊行街嘅何啟南，個樣順眼咗好多，加上全程笑咪咪，睇落好平易近人。

做完嘢嘅何啟南，同兩個工作人員一齊落樓，三個人企街「吹水」，大講世界盃波經。

喺無綫經常演反派嘅何啟南，喺處境劇《愛•回家之開心速遞》中，飾演法律部門主管阿John，成日夾埋「細龍太」Jenny（陳偉琪飾），使陰招害人。

現實生活中，何啟南係個負責任嘅好男人，去年同拍拖三年幾嘅圈外女友拉埋天窗。