鄭融雙黃線上車
鄭融曾經話過好怕塞車，所以有時候都會同男友搭港鐵，佢仲同東姑講：「我成日搭港鐵，都冇乜嘢，既方便又輕鬆，但就唔會着到做騷咁。（有冇試過畀其他乘客喺車廂騷擾？）冇，我好低調。其實，我拍拖都有同男友一齊搭港鐵，佢成六呎高，可以遮住我。」
不過，東姑前排就喺銅鑼灣嘅街頭，就見到鄭融同助手行到氣急敗壞咁款。呢晚，着咗西裝外套嘅佢，化咗一個濃妝，相信係啱啱做完嘢，所以佢冇選擇搭港鐵。
而趕住返歸慰藉男友嘅鄭融，截到的士後，佢竟然心急到喺禁止停車嘅雙黃線上車。佢份人咁唔遵守馬路上嘅交通規則，應該都係搭番地底下嘅港鐵會比較好啲囉。
每次出席活動鄭融都會着勁高嘅高踭鞋，做完嘢梗係唔會迫港鐵啦！
呢日鄭融冇男友喺身邊，所以同助手就選擇坐的士。
不過，鄭融同助手就違反咗交通規則，要的士司機停喺雙黃線前面。
