為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 07 月 08 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

真心兄弟班

跨越半世紀嘅友情,少一分真心都難以維繫,好似溫拿樂隊,譚詠麟、鍾鎮濤、彭健新、陳友同葉智強,兄弟情深厚到陳友再執導演筒,兼任編劇拍出由段段往事組成嘅電影《兄弟班》,仲排喺暑假黃金檔期上映,真係不可多得。

今次「Paco巨星飯堂」,我就邀請譚校長、B哥哥、導演陳友同健仔,去到位於青衣城嘅「豐魔茶廳」,一邊品嘗有heart嘅懷舊平民菜式,一邊細說佢哋嘅兄弟情。

溫拿樂隊係華語樂壇嘅傳奇之一,陳友將自己同一眾兄弟嘅往事,拍成勵志嘅《兄弟班》,其他成員梗係二話不說,力撐好兄弟!

 

光影留真情

喺唔少觀眾眼中,都係從陳友嘅導演身份認識佢,資深啲嘅先知道佢係溫拿嘅鼓手,今次導演將兩者二合為一,拍成《兄弟班》。「我哋嘅人生都去到咁上下(校長:「你講咩呀?o依家連一百歲都叫『英年早逝』o架!」阿健:「啋!」),俾我講埋。因為有昨日嘅我哋,先有今日嘅我哋,所以就有呢部戲嘅出現嘞!而戲入面,感情嘅邏輯係真o架,所以劇本唔係我寫o架,係班兄弟嘅一生。」

電影未上映,但好消息已經有嘞!導演話:「部戲俾紐約亞洲電影節睇中,仲搵咗班鬼佬band,嚟唱溫拿嘅歌,仲問我哋好唔好,咁梗係好啦!」

主意多多嘅校長仲即時建議:「我就話最好搵Village People,唱〈YMCA〉有手勢吖嘛,我哋唱〈L. O. V. E.〉又有手勢,好似咁L. O. V. E.(以〈YMCA〉曲調唱出)。」

B哥哥立即和議:「最有意思!」見一眾兄弟開始離題,陳友再講:「講番部戲先,今次我搵咗一班後生仔,飾演我哋嘅年輕版,唔只係因為佢哋似阿倫阿B,仲要睇埋佢哋嘅音樂底子,唔係佢哋揸起樂器上嚟都唔似樣。」

我帶四位貴賓,去到位於青衣城嘅「豐魔茶廳」,一邊品嘗有heart嘅懷舊平民菜式,一邊細說佢哋嘅兄弟情。

 

導演陳友話,今次電影嘅情節,全為佢哋一班兄弟嘅人生,並非做戲咁做。

 

招牌茶廳焗豬扒飯($68),低溫慢煮煎豬扒,配上香油洋蔥炒飯,加入鮮茄醬及三重芝士(guryere 、parmesan及mozzarella)等配料,性價比極高。

 

咖喱蝦球喇沙燴意粉($68),以香濃馬來西亞咖哩,配上新鮮蝦球及香脆蝦米乾,再加入紫蘇葉,帶出全新配搭。

 

欖菜醬熱狗配薯條或沙律($38),以自家製欖菜蛋黃醬,配雙腸香脆甜包,中西合璧。

 

「阿健」做主角

電影嘅主角,係由陳家樂飾演嘅「阿健」,真.阿健雀躍表示:「佢手結他又得,啲戲又得(校長:「直情係將你激活咗啦!」)。我贏晒啦!佢演得好有深度,其實演我係難嘅,佢演得剛柔並重,最重要係識彈結他,佢仲買咗支靚Telly(電結他),睇得出佢係識貨嘅!我仲叫埋我阿媽,去片場睇我呢個替身,陳友真係報恩啦!」

B哥哥就話:「今次我個角色,最似我嘅地方一定係把聲,因為廣東話同國語版,都係我配音嘅。哈哈!唔知點解,陳友設計到我嘅角色好大俠,但真實嘅我係冇咁大俠嘅。」

校長又搞gag:「咁可能係呢個年輕人,參考咗當年鄭少秋嗰啲角色,然後去演你呀!」

校長表示,睇Trailer後最有feel嘅情節,係見到飾演阿叻嘅王梓軒被追打,「嗰陣阿叻成日打交,主要係俾人打,成日搵地方匿,真係一睇就有共鳴!」

 

真.溫拿五虎盛讚五位飾演自己嘅年輕人,對於佢哋嘅演出,真係要拭目以待。

 

由陳家樂(右)飾演「健仔」,健仔話自己贏晒,全因前者長得靚仔。

 

招牌手撕雞撈麵($68),先將蝦米油抄香蝦子麵,配上白鹵水浸手撕雞,而自家秘製蝦米辣椒醬,為菜式增加特色。

 

避風塘黑白胡椒豬扒一丁($62),先將豬扒煎到七成熟,再炒香韮皇、韮菜、銀牙到半熟,加入所有材料,配上自家秘製嘅避風塘黑白胡椒,夠晒惹味。

 

招牌豐哥雞飯($78),選用台灣香米,仲以純雞湯煲飯,加上手撕雞及自家秘製醬料,將雞用不同嘅方式,做出不同配搭,將飯撈勻為一體,係最佳食法。

 

誠意購版權

至於身在澳洲嘅阿強,電影中就由林耀聲飾演。陳友話:「我睇《點五步》嗰陣,見佢沉沉 鬱鬱,好有阿強嗰種感覺。我設計嘅『阿強』係冇乜嘢講,因為做兄弟就唔使講,佢就係唔使講嘅代表人物。」

選角以外,陳友喺配樂上都落足誠意、心機。「溫拿嘅歌,做好晒開機拍嘅就有十六段,仲未計其他配樂。其中買版權買得最辛苦嘅,係阿倫嘅〈愛在深秋〉,我諗住喺我哋幾個分開發展,佢就出咗幾隻爆紅嘅歌,我哋幾個就噏噏耷耷,喺呢個情節入面播,個位係咪好靚先?

「點知偏偏就買唔到隻歌,因為個作曲人過咗身,我又唔想放棄,搵咗半年,終於都俾我買到!」

由於B哥哥為自己嘅角色配音,佢幽默地話聲音係同真人「最似」嘅部份。

 

 

 

除咗一眾年輕人,戲中嘅「父母」全為有金像保證嘅實力派,包括金燕玲、任達華、廖啟智及惠英紅等。

 

 

 

甜品鴛鴦奶凍($28、上圖)配上朱古力爆炸糖及風乾士多啤梨脆片,而奶茶奶凍就有紅豆及風乾青蘋果脆片,增添層次。

 

豐魔茶廳
地址:青衣青敬路33號青衣城2期1樓197號舖
電話:26613433、26613599