為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 07 月 05 日

建制冷待空置稅 免無辜變反對派

七.一剛過,標誌特首林鄭月娥剛上任一年,林鄭喺升旗儀式中自評上任首年「開局良好」,之不過林鄭第一張成績表,最近就因為空置稅問題,建制派議員呷醋呷到出面。事關早前政界唔少聲音認為林鄭首年喺解決房屋問題上採納公民黨一直倡議嘅空置稅,搞到建制派一肚氣。

上周新政策一公布,公民黨就大鑼大鼓支持,喺地區改掛「爭取地產商空置稅」嘅橫額,攞晒頭彩。那邊廂,身為建制第一大黨嘅民建聯遲遲未表態,直至七.一民記副主席陳克勤先首度開控,話林鄭「有心無力」,壓抑唔到私人樓價,「見住輪公屋時間愈來愈長,只提出空置稅呢啲花招。」他依舊無講明支持定反對,但聽得出醋意相當濃。

不過,本身係地產界議員嘅石禮謙,就無得揀要代表業界反對,仲批評林鄭只聽部分政黨意見,「聽公民黨個郭榮鏗話係好橋就推,但政府唔係要政治化件事。政府政策失衡,林鄭要交成績打擊地產商,搞到社會好分化。」就咁聽,似乎話林鄭厚此薄彼。

有建制中人透露,空置稅遭建制派冷待,「同泛民打對台,即係同政府打對台,我哋無端端變咗反對派,所以如非必要,o依家無謂出聲啦。」外界預料,空置稅議案應該會好快獲立法會通過,「太激烈反對分分鐘變野孩子,議案通過後就好難落台。」

正因如此,石禮謙所屬的經民聯、及自由黨等建制派反對還反對,但都不約而同選擇改為爭取重新定義「空置」,以免政策太辣,令發展商將稅項轉嫁買家,推高樓價,「例如有無追溯期、幾時開始倒數空置期等,我哋傾向爭取攞到滿意紙後先計,倒數期一年變兩年就仲好。」該建制中人續說。

建制派除咗想減辣,仲齊聲希望林鄭先解決土地供應問題,經民聯盧偉國早前仲反問:「唔夠麵粉而去罰整麵包嘅人,你話公唔公道?」不過,公民黨就食住上,要求政府加辣,譚文豪說:「稅率要夠入肉,先逼到地產商。」究竟今勻政府仲會唔會聽公民黨支笛?

林鄭採納公民黨倡議嘅空置稅作為解決房屋問題嘅頭炮,泛民大鑼大鼓力撐,反而建制派議員冷眼食花生,醋味甚濃。

 

上任一年房屋政策未解決,林鄭月娥急不及待推出六招壓抑樓市。

 

一手樓空置稅措施推出後,部分發展商隨即加快步伐推出新樓盤。