為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 07 月 07 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

佳兆業自強不息重拾佳績

最近留意到一則新聞,關於佳兆業集團(1638)喺六月份舉行股東周年大會,內文係集團主席郭英成同小股東面對面交流,仲有小股東專誠由深圳來港出席以示支持。本來開股東會唔係新聞,但睇返公司在二○一五年至二○一七年停牌兩年間嘅重組復牌之路,去年更成功扭虧為盈,呢份成績表和股東會實在得來不易,又難怪會上新聞。

郭兄自己都形容嗰兩年可謂嘗盡「甜、酸、苦、辣」,不過我對呢位老友好有信心,佢有我哋潮州人堅毅同勤奮嘅性格,復牌一年多以來,馬不停蹄推動業務發展,憑藉手上一線優質土地儲備,喺多間銀行支持下完成重組,並重返債券市場。公司穩定落嚟之後再獲納入MSCI明晟中國小型指數,以及恒生綜合指數和恒生港股通指數。

公司仲藉股東會呢個場合同新昌集團(0404)簽訂框架協議,為對方喺內地嘅部分項目提供建築、市場推廣和管理服務。上星期又向聯交所遞表申請分拆從事物管業務嘅佳兆業物業喺主板獨立上市,一方面藉此變現佳兆業物業嘅投資價值,另一方面可以更清楚分開集團同物管公司嘅管理同融資,從商業考慮同股東利益兩方面都有好處。

佳兆業喺二○一七年嘅合約銷售創歷史新高,達四百四十七點一億元(人民幣,下同),超出目標一成二,同時將二○一八年全年合約銷售目標提升五成至七百億元。由於公司項目集中在一線和重點二線城市都市圈,銷量提升嘅同時,合約銷售均價亦按年增長二成二,每平方米逾一萬六千元。

中央大力發展大灣區,佳兆業在深圳起家,佔有地利優勢,睇返二○一七年合約銷售之中,五成六來自大灣區,而經濟同樣發達嘅長三角區域就貢獻二成一。按城市級別嚟分,包括上廣深等一線城市嘅合約銷售佔總數五成一,二線城市佔四成四。能夠立足一二線城市,有賴多年來積極喺大灣區和京津冀城市群建立土儲,把握國策所帶來嘅機會,未來除咗繼續發展一二線重點城市,仲會喺核心城市周邊布局,尋找新發展空間。另外,佳兆業參與城市更新項目,呢方面亦能夠提供更多土儲,當中包括廣深兩地約八十萬平方米土地,有助加快公司回復正軌。

公司去年扭虧錄得純利三十二點八億元,更重要係恢復派發股息,除咗股東開心,亦反映公司資金流充裕。如果現金流許可,公司希望日後能回復二○一四年約三成嘅派息比例。同時,毛利率由二○一六年嘅百分之十三,升至去年百分之二十七點三,反映公司問題已逐步解決,開支比率亦正在下降,見得到內地樓市調控政策對集團的影響,較其他內房股輕微,毛利率應該仲有上升的空間。

佳兆業復牌後市場普遍接受,公司最近獲頒優質內房股獎項,係對郭兄同管理團隊嘅努力同決心一大肯定,我戥佢高興之餘,更期望公司屢創佳績。

佳兆業近年成功重組,並扭虧為盈,圖為集團首席財務官劉富强(左)出席優質中國房地產企業大獎頒獎禮。