王敏德踎「茶記」慶祝父親節

王敏德（Michael）呢個半唐番老竇，作風洋化，同啲仔女冇代溝，可以一齊去玩、去蒲、去揸直升機，係圈中出晒名嘅sweet Dad。

早前，Michael同王敏奕（Venus）喺劇集《飛虎之潛行極戰》中飾演父女，兩個非常啱key，更加拍出父女真感情。喺上周日嘅父親節，呢對「螢幕父女」仲拍咗條短片，Michael以爸爸身份，不斷以短訊囉嗦「乖女」，而Venus就感到「爸爸」好煩厭。不過，短片到結尾，Micheal問：「結婚後，帶埋我一齊住啦！」Venus就回應：「雖然一直以來，我都覺得你管太多，但結婚後，我都想繼續照顧你o架！」咁窩心嘅短片，其實係趁住父親節，向天下嘅父親表達愛意。

喺現實中，父親節嘅正日，東姑喺跑馬地巧遇Michael。當日下晝兩點幾，佢同埋太太馬詩慧（Janet），三個仔女包括：大女王曼喜、二女王麗嘉同埋孻仔王躍穎，一家五口居然喺呢個大節日，去咗一間平民「茶記」開餐，慶祝父親節。五個人逼埋喺一個卡位，感覺寧舍親密，真係特別暖心。東姑見囝囝仲好生性、好乖巧，啲嘢食嚟到，即刻幫嗲哋、媽咪遞上刀叉餐具。至於兩個女，似乎同嗲哋、媽咪亦完全冇代溝，一家人好好傾，有講有笑傾到雞啄唔斷，真係樂也融融。

而更難得嘅係，Michael同Janet兩公婆人前人後都keep住恩愛，東姑見佢哋喺幾個仔女面前，忽然甜蜜咀咗一啖。呢對模範夫妻，絕對可以做仔女嘅楷模，家庭至上，親情第一。

Michael同Venus呢對「螢幕父女」，拍咗條窩心父女情嘅短片，祝賀父親節。

自細已經同啲仔女打成一片嘅Michael，係個好開通嘅爸爸，同子女感情十分融洽。

父親節正日，Michael同老婆Janet，同埋三個仔女去「茶記」開餐，一人一碟「碟頭飯」，一杯凍檸茶，簡簡單單一餐。

爹哋食嗰碟五十四蚊嘅雜扒飯上枱，囝囝好乖巧兼好貼心咁遞上餐具畀嗲哋。

席間，Michael同Janet兩公婆好恩愛，不時互相分享睇電話「芒」，一家人都有傾有講。

雖然呢日係父親節，但係埋單嗰個，都係呢個「甜心爹哋」，佢似乎好慣性咁走埋收銀枱找數。此外，東姑發現二女（紅衫）着得好性感，內衣若隱若現。

爹哋開通同啲仔女完全冇代溝，食完飯，二女同孻仔仲各有各走。

背脊開咗個窿嘅大女王曼喜好孝順，留低陪爹哋，父女結伴行街時，仲有啲似情侶拍拖。