主頁 > 專欄 > Paco巨星飯堂 > 最強出品 2018 年 07 月 01 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

最強出品

一講到「宇宙最強」，梗係令人諗起甄子丹！佢飾演嘅葉問，一個打十個，深入民心；佢喺八月上映嘅新戲《大師兄》，就一個教廿八個，春風化雨，夠晒突破！

今次「Paco巨星飯堂」，我就請嚟丹爺新作嘅導演闞家偉，率領戲中飾演學生嘅四位新力軍：湯鎮業一對孖仔湯君慈（Bruce）及湯君耀（Chris），喺香港土生土長嘅尼日利亞混血兒Gordon Lau，同首次演戲嘅李靖筠（Gladys），細說呢部熱血電影背後嘅故事。

我帶五位嘉賓，去到位於旺角嘅「回到味來」，品嘗特色火鍋，暢談同丹爺合作嘅精采。

Chris、Gladys、導演、Gordon同Bruce（左至右），喺電影《大師兄》中，分別喺「宇宙最強」丹爺身上，學到唔少嘢。

丹爺孭飛

同丹爺合作，已非導演闞家偉嘅首次，「之前我跟今次嘅監製晶哥（王晶），做副導演嘅時候，已經同甄生合作過好幾次，佢好nice，一投入工作就專業、好認真。今次為咗籌備同拍攝，我哋就足足用咗一年幾嘅時間。甄生啲期好密之外，我哋係實地取景，所以又要就番學校放暑假嘅期間拍，頭尾只係拍咗三十幾日。

「甄生話今次係佢嘅動作電影生涯中，最困難嘅一部戲，戲入面佢遇到史上最難對付嘅對手，又要面對調皮嘅學生。我哋為咗將校園同動作完美結合，都花咗唔少工夫。甄生俾咗好多idea我，好似為咗拍到學生最真實、最貼地嘅一面，我哋由day one就必須搵到最啱演嗰批學生嘅演員，要有嗰種純真感，又要有演戲嘅potential。跟住roll機前嗰幾個月，甄生仲叫咗我同幾個同學，日日一齊培養感情，到正式開機嗰陣，就有一種默契。」

除咗導演，今次呢部充滿正能量嘅電影，能夠拍得成，另一個原因係關於一個man爆嘅承諾，去年甄子丹同王晶合作完《追龍》之後，二人就約定要再拍一部電影，o依家拍成《大師兄》，就係佢哋兌現呢個承諾。「我哋都係爸爸，每日面對好多小朋友嘅教育問題，至於結合教育片同商業片，係因為觀眾肯定要睇甄生打，佢話希望喺呢部戲打嘅每一拳，都可以守護o依家嘅年輕人。」

我帶五位嘉賓，去到位於旺角嘅「回到味來」，品嘗特色火鍋，暢談同丹爺喺新戲《大師兄》合作嘅故事。

電影將於暑假黃金檔期上映，可謂校啱timing。

惡魔雞煲（$158半隻/$298一隻），選用全球第五辣、四川出產嘅「惡魔辣椒」炮製，有四種辣度可供選擇。

宮廷菊花鍋（$388、須預訂），每日熬煮嘅魚湯，加入杭菊及貢菊，係慈禧太后時期嘅宮廷菜式，現代化後配上原條桂花魚，加倍鮮味。

南瓜海鮮湯（$228），將南瓜磨茸煮湯，配上蝦、蟹、貴妃蚌、墨魚仔及大蜆等海鮮，將海、陸嘅甜美共冶一鍋。

打戲真做

而喺戲中嗰班「年輕人」，就包括Bruce同Chris，佢哋去年簽約成為甄子丹公司旗下藝人，就立即有演出機會，佢哋飾演問題學生，老闆丹爺就做熱血教師。

Bruce話戲中兩兄弟假戲真做，全因為老闆出橋。「有一幕講我哋起身返學，甄生覺得情節有啲平淡，於是就叫我哋打交，豐富吓嗰場戲。拍完之後，導演覺得我哋打得唔真，後來再拍，打打吓我哋就變咗真打。初時導演唔知發生咩事，仲睇得好入神，慢慢先知我哋原來真係打緊交，於是就過嚟阻止，然後叫我哋冷靜啲。」

Chris坦言自從中四後，兩兄弟就冇再交手，但之前佢哋都試過打到入醫院，「當年因為打籃球，我哋發生爭執，後來變咗打交，阿哥一拳打落我個鼻度，仲打到歪咗，嗰時即刻Call白車入醫院，之後我哋就冇再打交嘞！」

講到同丹爺合作，Bruce話老闆要求高，但亦有袋錢落佢袋。「甄生喺片場咖啡不離手，做嘢從來唔會玩電話，佢仲成日叫我哋要認真啲，話工作態度好重要。」

Bruce（右）同細佬Chriso依家keep住有練泰拳同武術動作，為演武打戲種，做足準備。

簽約甄子丹（左二）公司後，孖仔的機會接踵而至。

Bruce（左）早前同爸爸湯鎮業（中）拍攝內地網絡電影，「爸爸喺片場好似變咗另一個人咁，因為佢好入戲，眼神又凌厲，把聲仲特登低音幾度，同我認識嘅佢好唔同。」

黃燜雞煲（$158半隻/$298一隻），以不辣嘅秘製醬料製作，雞肉嫩滑多汁，帶點點陳皮香。

招牌當歸鴨（$168），配上藥膳湯底，相當滋補。

青春班底

除咗湯氏孖仔，Gladys同Gordon係另外嘅重點「學生」，Gladys由模界首次涉足影壇，就拍住國際巨星，佢坦言獲益良多。「喺現場見到甄生咁專業，我哋做新人就更加不敢怠慢。戲入面嘅角色同我都有啲相似，加上開工前，導演叫我哋一班學生培養感情，到拍嘅時候，我哋好自然就做到嗰種感情，係好有滿足感嘅。」

戲中嘅「南亞裔」學生，由有一半尼日利亞血統嘅Gordon飾演。「我嘅角色係好鍾意唱歌嘅，但係現實生活中，我屬於五音不全嗰啲，不過今次真係學到唔少嘢。」

Gordon本身係youtuber，佢嘅channel「MIHK VLOG」有唔少街頭測試短片，吸引到13.5萬捧場客，真係後生可畏。