張文慈秘擁二千萬物業

近期無綫熱播劇集《宮心計2深宮計》，除咗胡定欣、劉心悠、黃心穎呢啲女主角搶鏡之外，二線嘅一班「尚宮局四司」一啲都唔輸蝕，包括：羅霖、張慧儀、康華、張文慈，個個年過四十歲，但保養得宜，堪稱「美魔女」。

早前，東姑喺商台門口遇上「司膳房司膳」張文慈（Pinky），穿着一身彩藍色套裝，襯埋個藍色名牌手袋，又索又sharp；不過，焦點一定落喺佢對腳度，皆因當日佢着住條短褲仔，勁騷一雙白滑長腿，最為「吸睛」。現場見佢原來仲好受歡近，竟然有大把粉絲專程嚟到守候佢，攞埋啲珍藏品畀佢簽名，同埋向佢「集郵」，受追捧度，一啲唔遜色過啲八、九十後嘅女神。

難得佢對粉絲仲來者不拒、無任歡迎，雖然就男女有別，優待女粉絲可以同佢親密攬攬合照，男粉絲就冇呢個待遇，合照時要保持距離，但係佢全程都笑面迎人，盡量滿足晒大家嘅要求，認真平易近人。

論姿色、論粉絲數量，Pinky都唔輸蝕，若論身家，佢更加「大把貨」。東姑所知，佢現時有兩個物業揸手，一個係自住嘅何文田爵士花園豪宅，另一個就係兩年前買入，投資收租嘅油麻地駿發花園單位，兩個物業加埋市值成二千幾萬；加上佢平時出入，都揸住架價值近七十萬嘅平治代步，可見佢身家唔嘢少！

有傳Pinky拍攝《深宮計》時，受壓力影響致情緒受困，仲喺飯局中忽然當眾灑淚。

四十六歲嘅Pinky，駐顏有術，短褲騷長腿勁「吸睛」，不愧為「美魔女」。

屬於「元祖級」女神嘅Pinky，有大班忠粉帶埋偶像啲靚相珍藏品，畀佢簽名。

女粉絲得到Pinky嘅特別厚待，任對方攬實條小蠻腰，影親密合照。

男女始終有別，雖然男粉絲冇得攬攬，但係可以同Pinky握握手，都算係肌膚之親。

有二千幾萬物業揸喺手嘅Pinky，揸七十萬平治代步，可見佢身家有番咁上下。