莊思敏翻撻葉念琛？

馬來西亞拿督千金莊思敏，一三年傳出跟導演葉念琛因合作數碼電台節目，而互生情愫。事後，葉導演每次開戲，都預埋緋聞女友一份。而當年，二人更被拍得撐枱腳，葉導演更進駐女方嘅豪宅。不過，莊思敏就強調︰「導演係我朋友！」而佢哋嘅戀情亦不了了之。

事隔五年，上個星期一晚（十一號）係薛家燕娶新抱嘅大喜日子，東姑都有份去飲宴，同場仲見到呢對過氣嘅緋聞情侶。莊思敏跟兩個妹妹喺拿督媽媽帶領下出席，而葉念琛則其後抵達。鏡頭前，兩人冇碰頭機會，但入到場內，冇記者喺度時，佢哋就自自然然咁埋身交流。

嗰晚去到尾聲，東姑見葉念琛突然走咗去莊思敏嗰圍，仲好順理成章咁坐喺女方嘅身邊，隨即二人不斷咬耳仔，又細聲講大聲笑，儼如熱戀中嘅情侶一樣。佢哋傾到雞啄唔斷，直至葉念琛要接電話，莊思敏先走去會合番阿媽同兩個細妹。其實，大家都冇另一半，翻撻話咁易啦！

莊思敏跟葉念琛咬耳仔期間，二人嘅手臂貼到實一實，好鬼煙韌噃。

雖然台上有一對新人分享，但台下嘅葉念琛與莊思敏卻樂享自己嘅二人世界。

二人愈講愈冧，仲頭貼頭添，sweet到爆！

直至葉念琛要接電話，莊思敏先無奈咁起身，走去會合番遭佢冷淡對待嘅阿媽同細妹。

莊思敏阿媽江玉珠曾經係前麗的電視嘅藝人，跟家燕姐早已認識，故帶埋三個女嚟飲。