主頁 > 專欄 > Paco巨星飯堂 > 深宮講心 2018 年 06 月 24 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

深宮講心

TVB話題劇《宮心計2深宮計》，不論收視定點擊率都獲得佳績，除咗要歸功總監製梅小青，一眾演員嘅努力，都不可抹煞。

今次「Paco巨星飯堂」，我就邀得小青姐，仲有首次演出TVB劇集嘅劉心悠，同埋另一宅男女神黃心穎，大談華麗深宮背後嘅故事。我帶三位嘉賓，去到位於銅鑼灣嘅「Otto Restaurant」，品嘗特色法國菜，慢慢「講心」。

喺小青姐（中）嘅悉心指導下，兩位BB：心悠同心穎喺《深宮計》嘅演出，都大有進步。

電影製作

小青姐既為九年前《宮心計》嘅監製，今次身兼總監製同編劇，梗係精益求精。「今次由籌備到出街，足足花咗兩年時間，除咗演員，取景、分鏡、燈光到後期製作，全部都用電影嘅方式去做，所以要特別花功夫。」

o依家新聞鬧得最熱烘烘嘅，就係關於周秀娜嘅戲份問題，小青姐就強調，劇集出街時，並冇刪減娜姐戲份。「娜姐喺第18集先出場，佢演得好好，我哋冇cut過佢一句對白、一場戲。我哋拍得好開心，佢好乖，個人又好好，希望公司快啲解決件事，等我可以有機會再同佢合作啦！」

而對於揀選在座兩位BB演出，小青姐話：「我寫『元玥』嘅時候，就係諗住心悠，佢氣質好純，係呢個角色嘅不二人選。而心穎嘅劇我一直都有留意，外面話我搵佢係因為馬國明，其實我搵佢嘅時候，係完全冇睇過佢有咩緋聞。」

心悠就話，一直想和TVB合作。「今次係天時地利人和，小青姐打俾我嘅時候，我嗰一刻就係同啲同事講緊，我好想拍TVB嘅劇，所以今次對我嚟講，真係一件心想事成嘅事。

「而且隊crew好歡迎演員一齊創作，小青姐話有咩idea都可以講出嚟，咁我就把握機會啦！因為我一直都好想做肢體嘅表演，又學過跳舞、耍劍，我話如果今次古裝劇用到就好嘞，估唔到佢哋真係加咗落去。」

對於心悠用廣東話講對白，小青姐表示：「其實佢嘅表現，比我想像中好好多，不過我唔可以俾佢知，仲要話佢講對白唔清楚，等佢keep住練習。」

我帶三位嘉賓，去到位於銅鑼灣嘅「Otto Restaurant」，品嘗特色法國菜，大談華麗深宮背後嘅故事。

心悠仲話：「我同周秀娜都係首次拍劇，啱啱入劇組嘅時候，都有自己嘅演戲模式，但見到其他人都習慣電視嘅拍攝方式，於是我哋都去學、去適應。」

東方之珠（$128），以分子料理手法製作，內裏為鴨肝醬。

石鍋紙包龍蝦湯（$218），本已濃郁嘅湯汁保持溫熱，令人回味。

北海道帶子配蟹皇羹（$168），鮮甜！

至Fit狀態

講就咁講，但小青姐都特別為心悠改劇本，講佢因為加入雜耍團，令口音有所改變，但深奧嘅對白，都考起呢位BB。「我有好多字唔識，所以有時發音唔準，同蕭正楠對戲嘅時候，佢爆笑話我講咗粗口，但係我都唔知。」

雖然唔係第一次演古裝劇，但要講廣東話、演香港製作嘅劇集，就係心悠嘅第一次。「廣東話就一定要練，而且台詞都係古文，我要花更多時間做功課。今次拍攝時間長，所以又要train體能，仲有身體柔軟度，雖然我唔使打，但係我個角色身手好好，入宮前係玩雜耍。拍呢個劇，我feel到所有人嘅collaboration，唔係一個人做得好就得，要整體都perfect。」

於是喺為期五個月嘅拍攝期，心悠一直用堅強意志，叫自己保持良好狀態。「拍劇好趕好忙，狀態一定差，所以飲食要smart，例如要避免食消夜、夜晚唔食澱粉質，但早上第一餐要食得好飽，因為化粧梳頭至少要用三個鐘，準備好入得廠，又差唔多肚餓！」