主頁 > 專欄 > Paco巨星飯堂 > 跨界舞台 2018 年 06 月 17 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

跨界舞台

o依家流行跨界別，但係要喺唔同平台都有出色表現，並唔係一件易事。由馬浚偉（Steven）一手策劃兼主演嘅舞台劇《偶然．徐志摩》，一六年初演時獲得一致好評，即將加入新演員載譽重演，成績斐然。

今次我邀請Steven，仲有女主角胡定欣、黃澤鋒同林敬剛，去到位於九龍灣嘅「江南庭敘」，一邊品嘗特色火鍋，一邊暢談舞台上下嘅二三事。

Steven同定欣（前排）喺舞台劇《偶然．徐志摩》中，延續近日熱播嘅《深宮計》嘅拍檔情緣；加上演技派澤鋒（後左）同King Kong（後右），呢個跨平台嘅舞台劇組合，確實令人期待。

身兼數職

早喺一六年，Steven已經越級挑戰，走上舞台劇嘅舞台，仲自己寫埋劇本，由投資者、演員，一手一腳去籌備舞台劇，同時身兼數職。

「舞台劇好玩嘅地方，係你發覺同以前啲嘢唔同，尤其係當演戲去到一個樽頸位，唔知點去衝破一啲嘢，於是嘗試去了解舞台，仲會變番一個BB。你就會覺得，不如有啲嘢重新開始學起吖，學番出嚟點樣企、學番咩叫give and take、咩叫listen，我都用咗兩年幾三年時間，去了解舞台，睇咗好多書，睇咗好多documentary（紀錄片），仲去睇咗好多舞台劇，請教好多前輩，出嚟舞台應該係點，到o依家都要繼續學習。搵番呢啲嘢，可能咁先知咩叫做戲。」

今次舞台劇重演，Steven喺劇本上作出少少修改，加上今次資金較充裕，佢話要俾觀眾一個2.0嘅享受，亦滿足一下自己。「要滿足我對表演藝術嘅追求，我需要借助舞台呢個咁充滿奇迹、咁浪漫、咁充滿情懷嘅平台，去呈現我自己想創造嘅嘢，嗰種滿足感已經冇辦法用錢嚟衡量，就算要貼錢，我都會做嘅。」

我帶四位嘉賓去到位於九龍灣嘅「江南庭敘」，一邊品嘗特色火鍋，一邊暢談舞台上下嘅二三事。

Steven嘅心血——舞台劇《偶然．徐志摩》，將於今個月底起公演，身兼監、編、演三職嘅佢，話今次重演係2.0版本，觀眾一定唔會失望。

秘製沙嗲鍋（$108、前），師傅以家傳沙嗲秘方製作火鍋湯底，用蝦米、蝦醬、麻醬及十多款不同嘅香料等炒香，帶出獨特鮮味。清湯牛腩鍋（$288、後），湯底每日採用新鮮大牛骨，經過十多小時慢火熬製，配以本地特級牛坑腩及清甜白蘿蔔，夠晒原汁原味。

日本響螺（時價），嚴選新鮮北海道響螺，將其切成薄片涮煮，肉質纖細幼嫩，爽脆清甜，帶有淡淡海水鮮味。

精選牛肉拼盤（$388），每日以新鮮供應本地手切牛肉，嚴選多款精華部位，包括牛頸脊、金錢

深宮結緣

講到拍檔定欣，Steven話：「定欣係一個好好嘅拍檔、好朋友，我之前真係唔知佢冇男朋友，仲一直以為佢有添！我哋有好多合作，繼《深宮計》同舞台劇之後，仲會去加拿大演出。我同佢講，未來我寫嘅劇本都會預埋佢一份。

「我哋嘅藝術演出交流好開心，佢係一個對自己好有要求嘅女子，最難忘有一晚喺橫店，我哋拍劇拍到深夜四點，等埋位之際，我哋傾咗好多心事，我欣賞佢好謙虛，佢話拎兩次視后唔代表咩，仲好有興趣演出舞台劇，於是我哋一拍即合。」

一落實演出，定欣就積極為舞台劇排練，「我飾演陸小曼，最大嘅挑戰係要喺最短時間學好崑曲，不容有失。因為我之前出發去橫店拍劇前，就跟著名崑曲演唱家趙鳳儀老師學咗一段日子。喺橫店拍外景嗰兩個月，我都有日日練習，一返香港就第一時間搵趙老師惡補，真係唔敢鬆懈。

「雖然我有中國舞底子，喺造手台步、肢體形態嗰啲部份都較容易上手，但要我喺台上唱崑曲，係一個大挑戰，因為唱腔、唱法到演繹方式，都係我以前從來冇接觸過，難度好高。我只可以把握好時間學習，盡自己能力做到最好。真係好感謝趙老師嘅悉心教導，花精力同心機同我補課，又鼓勵同俾信心我。」

定欣一心挑戰自己，Steven就請佢演出舞台劇，佢話演舞台劇同電視劇嘅技巧大不同，表示今次嘅演出令自己增值不少。

因為劇集《深宮計》，令Steven同定欣有機會傾心事到深夜，亦促成今次佢哋喺舞台上嘅合作。

為咗更傳神演繹陸小曼一角，定欣特別向著名崑曲演唱家趙鳳儀老師（右）學習。

香脆南乳豬手併雞翼（$128），以專業手法細心處理豬手及雞翼，加入秘制南乳醬先燜後炸，外皮香脆，肉質軟腍帶爽而不油膩，對火候控制極為講究。

四寶水餃拼盤（價錢按款式而定），水餃拼盤有黑白海膽餃、三文魚蟹子餃、羽衣甘藍鮑魚粒蟹肉餃及鮮蝦水餃。每日篩選新鮮食材作餡，選用薄透嘅水餃皮，以巧手捏製出粒粒飽滿多汁嘅水餃。

蔬菜拼盤（$98），選用新鮮金菇、鮮冬菇及各款時令蔬菜，既能豐富湯底味道，亦食得更健康美味。

多年兄弟

澤鋒再度參與演出同一舞台劇，上次佢客串另一個角色，今次就飾演徐志摩嘅表哥沈叔薇。佢同Steven結緣始於九十年代嘅《開心華之里》，至今兄弟情不變。「我離開咗TVB五年，o依家順住自己嘅意思去行，教游水同泰拳，生活無憂。最重要係做自己喜歡做嘅教育工作。雖然一星期忙足七日，冇休息時間，但係我好enjoy。」

而入行三十四年嘅King Kong﹙林敬剛﹚，就係首次參與演出舞台劇，扮演陸小曼嘅夫婿王賡，「舞台劇好玩嘅地方係冇得NG，我本身唔係舞台劇演員出身，對一個拍電影出身嘅人嚟講，係一種挑戰。」

多年嚟佢多演出綠葉角色，King Kong坦言：「唔會諗太多（演主角）嘞，否則會諗到傻，公司安排咩角色俾我，我都會盡力去做。」