講股到越南

四天越南胡志明市美食導賞之旅圓滿結束，團友對於一日五餐嘅豐富行程，竟然有「投訴」，就係美食太多，肚子唔夠位！團友仲興致勃勃咁討論，建議下次再計劃行程時可以加入素食或輕食，「間」開吓啲大餐，見大家咁興奮，睇嚟好快又要出團嘞。

講到美食，我都好欣賞當地嘅法、越、中fusion菜，好多時同一餐嘅菜單已包含三種菜系嘅精粹，將傳統美食糅合創新煮意，美味之餘不失新鮮感。

至於景點，令我印象最深刻嘅唔係玩樂地方，而係戰爭遺迹博物館。越南由一八八七年起至二戰前係法國殖民地，之後曾被日本佔領，到二戰結束就發生長達九年嘅法越戰爭，一九五四年舉行和平談判，南北越暫以北緯十七度分界。不過，和平並冇維持好長時間，一九五五至七五年國家再陷入越戰。七十年代後期大批越南人，包括越南華人逃離越南，香港當時被聯合國指定為第一收容港，不斷有船民湧港，以至有「北漏洞拉」嘅廣播，相信好多香港人仲記得。

在博物館參觀越戰遺物，更深入了解呢段歷史，愈加覺得心痛。越南人民飽受侵略和內戰摧殘，不但經歷失去摯親、家園被毀之痛，國家經濟更加停滯不前。近年經濟終於起動，但單睇市容似乎仍處於中國二、三線城市嘅境況。好似我同團友登上六十八層高嘅金融塔，喺五十一樓嘆咖啡，呢個高度喺香港好普遍，但在當地已經能夠俯瞰整個城市。

其實胡志明市嘅吃喝玩樂地方都好集中，而且治安大致不錯，去旅遊好方便。不過講起景點，我呢個團嘅團友真係好特別，有兩日大家竟然話唔想出去遊玩，叫我即席開番場現場版《人生交叉盤》，每日同大家chat足兩、三個鐘，而且各人踴躍發問，我都答唔晒咁多，好彩光大新鴻基嘅溫傑（Kenny）都報咗團，畀我臨時拉夫幫手做主持，真係唔該晒。

呢場越式交叉盤進行期間仲有件趣事，有位團友請我畀一個冧吧，佢會即場買十萬股，要求一日內賺到三萬蚊兩人團費。我介紹佢買新城發展（1030），當時接近收市佢即刻以六點九五元買入，我唔敢講一日到位，但團費一定賺到。結果佢第二日以七點三二元沽，超額完成，賺到團費兼有零用錢使。其他團友有冇跟我就唔知嘞，不過現場見到大家都有㩒機，可能有啲私底下賺咗都唔定。其實團友都係志在開心，小注怡情，所以講完股又開開心心咁去歎美食。

個團都未完，團友已經問下一團去邊？大家眾說紛紜，目的地有長有短，不過歸納各人意見，大家覺得我以前派駐過新加坡，在當地生活咗幾年，應該熟窿路；另外我個仔喺澳洲，我都成日過去，亦可以帶大家覓食。呢兩個都係美食旅遊好地點，等我諗諗先！