麥玲玲唐代美女界代表

無綫熱播劇集《宮心計2深宮計》，東姑集集都追睇，勾心鬥角嘅情節，真係好鬼緊張。東姑收到風，最尾一集仲有「彩蛋」，就係玄學家麥玲玲會驚喜客串，飾演一個宮外嘅金飾店老闆，同羅霖、張慧儀等，一齊做對手戲。而麥玲玲今次呢個古裝look，就令唔少網民拍案叫絕，認為珠圓玉潤嘅佢，相當有楊貴妃feel，係真正嘅唐代美女界代表，建議無綫開部新劇由佢擔正添。

網友睇完麥玲玲喺《宮心計2深宮計》嘅造型，大讚佢有楊貴妃feel，係真正嘅唐代美女界代表，建議無綫開部新劇由佢擔正。

見到咁多like，麥玲玲都好開心：「我以前都有試過古裝造型，不過係搞笑版，所以大家留意唔到，今次小青姐（《宮》劇總監製梅小青）好畀心機幫我打造呢個look，無論髮型、服裝，都做得好仔細。可能大家好少見到我唔戴眼鏡，有新鮮感，所以覺得個造型唔錯，但係我覺得唔可以講得上係靚女囉。其實，我一直都覺得自己適合喺唐代生活，之但係，我呢款喺嗰時會唔會係偏瘦呀？」

原來為咗呢一場戲，麥玲玲留咗喺橫店五日，當地天氣熱，又成日落雨，真係幾辛苦！佢笑言：「因為橫店嘅電壓問題，所以由凌晨五點開始至第二日十點，酒店係冇冷氣。當時，范冰冰都係住呢間，三千幾蚊一晚，都係咁，冇計！」今趟，無綫只係提供經濟位機票，而麥玲玲就帶埋老公、助手、化妝， 一共四個人，加錢轉坐商務機位；另外，酒店加食宿又upgrade埋；加上佢為人豪爽，成日萬歲請客，咁咪即係貼錢買難受？不過，佢竟然話如果再有得拍，佢都想繼續有得玩，希望長拍長有， 過下戲癮咁話。

雖然麥玲玲只係客串幾個鏡頭，但係劇組人員一絲不苟，髮型同服裝全部都好有要求。

麥玲玲今次喺套劇飾演賣金飾嘅金老闆，同離開咗皇宮嘅羅霖、張慧儀有對手戲；而拍攝當日，劇集總監製梅小青，都有在場

一四年，麥玲玲都曾經喺劇集《八卦神探》中，以古裝上陣，不過呢個係搞笑版小龍女，佢就話冇乜人留意到。

麥玲玲今次專登帶埋老公去橫店拍劇，有老公仔何德喺旁邊，難怪拍劇咁辛苦，佢都冇怨言。