吳卓羲後山gathering
自從吳卓羲（Ron）離巢無綫之後，觀眾見佢亮相嘅機會愈來愈少，好彩佢幫無綫拍攝嘅網劇《飛虎之潛行極戰》近來出街，粉絲先多番啲機會喺宣傳活動上面，同偶像見到多幾面。
睇嚟Ron亦好體諒一班粉絲嘅心情，早前東姑見佢返電視城幫手宣傳完新劇《飛虎》之後，坐住七人保母車，趕去TVB後門嘅後山草地，原來係約咗班粉絲喺度聚會。
東姑見Ron同十個八個粉絲輪流合照同簽名，雖然o依家冇公司backup，幫佢搞活動，但係就地取材，喺後山馬路邊同粉絲聚會都唔錯呀，總算叫做報答番「忠粉」對佢嘅愛戴同支持啦！
喺TVB做完宣傳活動之後，阿Ron趕去後門嘅後山草地，同一班粉絲聚會。
阿Ron好識做，同啲粉絲影吓合照，盡量滿足佢哋嘅要求。
難得班粉絲咁忠心愛戴同支持自己，阿Ron臨走仲揮晒手，好似好依依不捨。
