黎諾懿行又「馬壯」企又「馬壯」

呢期備受無綫力捧嘅黎諾懿，啱啱喺劇集《逆緣》孖住夏文汐大玩忘年戀，演出身患絕症嘅有錢仔；之前，佢又喺《不懂撒嬌的女人》入面，演賤到出汁嘅「賤Han」。不過，喺唔少觀眾心目中，印象最深刻嘅，始終係佢喺《愛•回家》演出嘅「神之馬壯」，形象點搣都搣唔甩。

早前，東姑喺堅尼地城撞正黎諾懿為新劇《反轉貴利王》開工。當時，佢同朱咪咪喺一間餐廳入面拍攝，聽聞咪咪姐飾演佢外母，而佢就飾演一個高級督察，兩人拍緊一場喺餐廳鬧交講數嘅戲。即使黎諾懿點認真投入去演，但係橫睇掂睇，點都揮不走「馬壯」嗰陣味。現場所見，佢無論一舉手、一投足、一個表情，都好「馬壯」feel。就連私底下，見佢對住咪咪姐好殷勤成日笑騎騎個樣，仲有對住班幕後工作人員一味笑口噬噬，啲動靜都係似足「馬壯」，一樣咁「世界仔」同埋「襟撈」o架。

拍完餐廳戲後，黎諾懿走出街外繼續拍攝，東姑見有唔少街坊認得佢之餘，仲好雀躍搵佢「集郵」。不過，大家仲係猛叫住佢嘅角色名「馬壯」，反而冇乜人叫得出佢真名。呢個現象，對一個上緊位嘅小生嚟講，都唔知算係好事定壞事呢？

喺《反》劇入面，黎諾懿同咪咪姐飾演女婿同外母，現場見兩個喺餐廳講到扯晒火，相信係拍緊場鬧交講數戲。

一陣濃烈「馬壯」味嘅黎諾懿，埋位期間，見佢猛講笑

幕後工作人員換咪時，黎諾懿拉高件衫，露出名牌底橫之餘，又露出小肚腩，夏天到咗啦，快啲keep fit喇！

唔少街坊見到黎諾懿都好興奮，仲要求同佢合照「集郵」；不過，個個叫佢「馬壯」，好似冇人知佢真名。

除咗「馬壯」形象深入民心之外，黎諾懿自從升呢做咗「小春雞」嗲哋之後，愛妻「暖爸」嘅形象，亦不時喺社交網度勁吸「like」。