為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 06 月 03 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

樂在靈距離

音樂可以拉近人與人之間嘅距離,天賦靚聲如陳潔靈(Elisa),就更加可以藉音樂淨化人心。嚟緊Elisa將舉行個人演唱會,因場地關係同觀眾幾乎零距離,感覺更親近。

今次「Paco巨星飯堂」,我帶Elisa去到位於港島太平洋酒店嘅「中.西環」,品嘗特色嘅國際菜,暢談同樣國際化嘅音樂經。

Eliza將於今年七月,喺香港演藝學院賽馬會演藝劇院,舉行十二場演唱會,靚聲加上特別視覺效果,又點會唔令人期待?

 

突破性演唱

Elisa覺得音樂好powerful,今次演唱會,佢要將過去一直喺音樂路上保持嘅理念,用自己嘅情緒同經歷,全部投放其中。「我記得Paco你同我講過,人係需要move on嘅。我有時就係靠呢個動力,今日見到你,你俾我嘅energy又可以行多廿年,哈哈!不過,我行多廿年都未破到修哥(胡楓)嘅紀錄囉。」

九五年開過個唱後,相隔廿三年,Eliza將於今年七月,喺香港演藝學院賽馬會演藝劇院,舉行十二場《由靈開始 Private Music Room演唱會2018》。佢表示,「演唱會除咗有concept,亦會用最好嘅音響,再配合舞台劇導演Olivia(甄詠蓓)所設計嘅theatre。雖然場地只係容納到六百人,但我反而覺得咁先可以拉近同觀眾嘅距離。

「我會由出道時嘅英文歌,再唱廣東歌,加上跟唔同演奏者嘅featuring song,帶觀眾進入我嘅音樂世界。我過去幾十年有一個演繹方式,希望今次可以從另一角度,搵到突破。」

我帶Elisa去到位於港島太平洋酒店嘅「中.西環」,品嘗特色嘅國際菜,暢談音樂經。

 

Eliza今次嘅演唱會,從形象到舞台演出,都有唔同嘅突破。

 

 

 

鮮蟹肉粟米忌廉湯($98),以新鮮甜粟米煮成濃湯,加上鮮拆蟹肉、鮮忌廉及燒粟米粒,味道層次十分豐富。

 

凱撒沙律配大蝦($118),深受歡迎嘅經典沙律加上大蝦,口感爽脆,滋味無窮。

 

無花果香梨沙律($108),新鮮無花果及香梨配以新鮮沙律菜、蛋黄、菲達芝士及檸檬蜜糖油醋汁,健康醒神。

 

感覺赤裸裸

近年多參與唔同嘅演唱會,包括與國際歌后Patti Austin同Janis Siegel嘅《聲.夜The Great Ladies of Songs》、與葉麗儀同肥媽嘅《三個女人一個墟》演唱會,仲有顧家煇嘅作品演唱會等。「因為參與得太多演唱會,所以一路都冇諗過自己去開。直至去年倪秉郎打電話俾我,話有個場地,問我做唔做,得六百人做十二場,我計吓條數話要諗吓。後尾諗吓又唔係喎,紅館當然係一個好爆炸性嘅地方,但唯獨呢啲場先可以諗concept,而且喺咁細嘅地方,就好似好赤裸裸咁,我睇到你,你又睇到我。」

今次Elisa仲兼任演唱會總監,「音響一定要搵最好嘅,個概念我搵咗設計師又一山人,幫我諗由靈開始,建立My private music room。一定要『由靈開始』,唔可以『從靈開始』,因為陳潔靈得我一個,如果『從靈開始』就係陳松伶,係咪先?個『靈』字有inspiration(靈感)嘅意思。

「Olivia話我聽,佢唔識音樂、唔識做演唱會,我話正正因為你唔識音樂、唔識演唱會先搵你,好多人睇到我過去幾十年,喺舞台嘅一個演繹方式,如果我要突破自己,就要從另一角度,搵另外一啲我嘅嘢出嚟。」

廿多年來已經做過幾百場舞台音樂劇演出,

 

我同Elisa曾經喺華納合作,佢話對林振強填詞嘅〈翅膀下的風〉,特別有感覺。

 

Elisa壓台感強,同後輩同台一樣鎮得住。

 

今次演唱會嘅音樂總監,係同佢合作多年嘅倫永亮。

 

扒大西洋石斑魚柳($245),石斑魚柳伴以乾蔥薯仔、彩虹時蔬及香蒜水瓜柳牛油汁,賣相精緻。

 

海南雞飯($158),去骨海南雞嫩滑美味,配上惹味嘅辣椒醬及黑醬油,令人垂涎三尺。

 

最愛魚蛋粉

Elisa喺演唱會中,仲會唱出七十年代的英文歌,再到廣東歌,可以睇到佢嘅音樂,慢慢轉變。至於嘉賓方面,「好多時喺紅館開騷,我可以搵我嘅學生或者老友,但今次我會feature好多演奏嘅人,例如鋼琴、二胡及小提琴等,仲有一個玩形體藝術嘅。通常你搵得佢哋嚟做演唱會,你會指定佢彈呢首歌,但今次嘅演出唔係咁,我係feature佢哋,所以我會問佢哋有咩歌想彈,因為我尊重佢哋,我想做到一樣嘢係大家係一個group。我作為一個喺樂壇幾十年嘅人,香港樂壇一路一路巨變,點樣去令人尊重樂壇嘅每一粒明星,先係最重要。」

講到為演唱會keep fit,一睇Elisa嘅fit爆身形,就知冇特別需要。「都唔係嘅,我平時都有keep住做運動,唔使因為演唱會而有所改變。飲食上我又唔係奄尖嘅人,只係特別鍾意食魚蛋粉,唔食過量就冇問題啦!」

豐富嘅舞台經驗加上紮實嘅唱功,令Elisa更加國際化,曾跟爵士樂天后一齊舉行演唱會。

 

 

 

巨無霸公司三文治($165),選用燒雞肉、煙肉、車打芝士、煎蛋、牛油果、番茄、羅馬生菜及自家製蛋黃醬作配料。

 

越式炒河粉($125),加入蟹肉、越南扎肉、豆芽、豆卜、洋蔥、韮菜及酸梅汁炒成,開胃惹味。

 

豐富嘅舞台經驗加上紮實嘅唱功,令Elisa更加國際化,曾跟爵士樂天后一齊舉行演唱會。

 

中.西環
地址:香港干諾道西152號港島太平洋酒店1樓(西營盤站B3出口)
電話:21315908