為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 06 月 02 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

服務舊經濟 回報同樣豐盛

當市場熱衷於投資新經濟股份嘅同時,一間「舊經濟」下嘅機電工程及環境管理公司喺二○一五年上市,過去兩年多一直穩打穩紮,業績穩中有升。呢間公司剛改名為豐盛服務集團(0331)(前稱豐盛機電),上市兩年就改名,並非更換股東或管理層,而係公司收購咗兩項新業務,由單一機電拓展至清潔和洗衣服務,不變嘅係同樣主打舊經濟,點解公司咁「念舊」?

豐盛服務副主席林煒瀚(Patrick)同我解釋,舊經濟之下嘅機電、大廈清潔和洗衣都係生活必需服務,可以賺取穩定收入和利潤,所派股息亦比較穩定。此等業務確實唔會出現爆炸性增長,但一方面不斷有新商廈和設施落成,另一方面因為大家對室內空氣、食水質素要求日高,因此需求有增無減。參考公司截至二○一七年十二月底止六個月中期業績,純利按年升5.5%。公司上市時承諾分派不低於三成純利,過去派息比率更高達四成,息率近六厘。

公司無負債,坐擁十億港元淨現金,所以兩項收購都用內部資源支付,兩項目以二○一六年及二○一七年度分別錄得五千零五十六萬及五千一百一十一萬盈利計算,公司收購後如維持派息比率逾三成,二○一八年息率可高達八厘。

豐盛服務收購惠康清潔(Waihong)及新中國洗衣(New China),兩間都各自在行業享有悠久歷史,有市場地位兼有盈利。Patrick分析,現有機電服務,同新收購嘅清潔服務可以創造協同效應。好似o依家請人難,工資亦不斷上漲,豐盛服務正研究為清潔工人提供簡單培訓,等佢哋收工後可以在同一幢大廈OT一兩個鐘,做一啲機房風槽、風咀清潔工作,冷氣技工就可以集中處理較專門嘅程序,對客戶嚟講可以減省一啲技工成本,工人可以揾啲外快,對公司又可以紓緩人手緊張嘅問題,可以話係三贏。

唔好以為舊經濟行業就會沿用舊方法,Patrick提到,洗衣服務都有唔少創新點子。好似公司幫酒店、餐廳連鎖等企業客戶提供洗衣服務,佢哋喺每件制服放入晶片,洗完之後可以好容易咁按客戶要求,將不同數量、呎嗎、男女制服送返去不同分店。晶片亦可紀錄每件制服、檯布等曾洗過幾多次,更易追蹤衣物嘅壽命。

本行嘅機電和環境管理亦利用科技令設施設計、建造和管理更高效率。例如以往畫圖有時會同真實情況有點距離,如柱位唔準確就可能令消防喉或冷氣設備放唔落,應用BIM(建築訊息模型)建立3D虛擬實況,可以好似身歷其境咁擺放各種設施,更準確更像真。為咗加強服務,公司又設立熱線,客戶有任何機電問題,如果公司識整就安排人手幫客戶處理,就算自己唔識整,好似壞煮食爐咁,公司可提供中介服務,幫客搵供應商做。

我覺得呢項服務好有同理心,知道客戶嘅生財工具壞咗就要即時處理。熱線唔單止幫到客,假以時日話唔定會成為機電師傅平台!

豐盛服務集團拓展業務至清潔和洗衣,副主席林煒瀚(Patrick)(右)稱會在舊經濟行業,加入新經濟元素。