o依家嘅科技日新月異，一對情侶即使相隔異地，都可以零距離，令愛情缺少咗等待嘅珍貴。新片《某日某月》，就以九十年代做故事背景，帶出那些年小情侶嘅堅定，當中細節相信會勾起唔少觀眾嘅共鳴。

今次「Paco巨星飯堂」，我就邀請電影嘅導演劉偉恒，率領戲中嘅「訓導主任」雷頌德（Mark），及「親民Miss」陳茵媺（Aimee），去到位於銅鑼灣嘅「阿一海景飯店」，品嘗特色嘅中菜，暢談拍攝現場嘅點滴。

喺劉偉恒（右）執導嘅新作《某日某月》中，Aimee（中）同阿Mark（左）都有突破嘅演出，電影將於本月31日上映，到時真係要多多留意。

主角夠Pure

電影講述熱愛觀星嘅湯怡，與反叛嘅原島大地喺海邊相遇，暗生情愫。後來原島大地被父親送到寄宿學校，數月後仲要移民外國。二人日後難以相見，加上湯怡嘅母親不斷阻攔，但最終他們排除萬難，展開一段遙距戀愛，同時仲要面對親人、老師及同學等各方面嘅挑戰同衝擊。

導演劉偉恒表示，故事係承接佢首部執導嘅電影《王家欣》。「上一部係講尋找嘅愛情，今次就係等待嘅愛情，兩個人見唔到面，咁點呢？就係要等囉。」

搵湯怡同原島大地做男女主角，劉偉恒解釋原因係：「當我寫呢個故仔時，我想由一個好乖嘅人去做，但唔可以扮乖，要真乖。我留意咗湯怡好耐，佢真係一個乖乖女嚟，約佢見面時，佢真係好乖，佢唯一擔心係要做一個十幾歲嘅學生，但我同佢講你做到嘅。

「至於原島大地係我隨口講嘅，因為前年喺金獎像見到佢，覺得佢有日本人嘅氣質，當時我話如果係原島大地演就好嘞。跟住電影公司幫手穿針引線，即刻搵到喺日本讀緊書嘅原島，咁啱就到嗰邊嘅暑假，於是佢就返嚟拍嘞。」

我帶三位嘉賓，去到位於銅鑼灣嘅「阿一海景飯店」，品嘗特色嘅中菜，大談電影經。

導演（右）對男女主角原島大地（中）同湯怡（左）嘅表現，相當滿意。

我哋今次品嘗嘅「鮑魚套餐」，價格由$985起，詳情可向餐廳查詢。套餐有八個菜式，包括呢個香芒龍蝦沙律，夠晒開胃。

咖喱鵝肝焗蟹蓋，啖啖鮮味。

紅燒竹笙雞絲遼參羹，香濃味美。

實力派配角

阿Mark喺戲中飾演一個好嚴厲嘅訓導主任，負責管教原島大地，仲周不時鬧佢。劉偉恒笑言，識咗阿Mark好耐，仲話佢平時好Cool又冇乜表情，於是就大膽問佢：「我有個角色要黑口黑面嘅，你制唔制？」

阿Mark好快就答應，佢話：「我拍親齣齣戲都係搞笑嘅，佢（導演）話呢部真係唔係搞笑嘅，我未試過拍一齣唔係搞笑嘅戲，今次終於可以好正經咁做一個角色，咁我即刻制囉。」

另一個原因，係今次演出對阿Mark嚟講都算容易，「其實我不嬲係咁（Cool），但o依家脾氣係好咗嘅，所以角色只係做番較早前嘅我，即係脾氣唔好嗰陣時，過程都好好玩嘅。」

Aimee飾演嘅英文老師就同阿Mark相反，性格善良，與學生比較friend，仲教原島大地追女仔。佢記得電影中最深刻一場戲：「當我終於知道男朋友唔會嚟，等待原來係冇用嘅，我覺得好失望、好sad，拍完嗰場戲我仲喊到收唔到聲，工作人員都行埋嚟問我：『Are you ok？』。」

已為三子女之母，Aimee仍然keep得好，佢話要勤力運動，飲食就可以隨心。

阿Mark同Aimee嘅角色性格相反，對戲中嘅一眾學生有唔同嘅作用。

實力綠葉仲有飾演學校看更嘅夏韶聲，佢同原島大地最多對手戲。

被公認好戲嘅邵美琪，飾演湯怡嘅媽媽，演繹動人嘅母女情。

紅酒燴牛尾，特別挑選較大嘅烏拉圭牛尾製作，更有肉地。

天白花菇扣鮑魚伴唐生菜，可選擇品嘗唔同嘅鮑魚，詳情可向餐廳查詢。

老公最贊成

Aimee強調，依然對演戲充滿熱誠，會盡量平衡家庭與事業。「老公（陳豪）都好支持我嘅事業，接到好角色，我會先同老公度時間，起碼要有其中一個留喺屋企照顧小朋友，我哋係teamwork嘅。」

身為三個小孩嘅媽咪，Aimee可謂圈中索媽之一，但今次接拍電影，就要為藝術犧牲，造型極之老土，仲完全埋沒Fit爆身段，以符合「魯姑婆」外號。「起初感覺導演有少少想試探我，話角色服裝可能有啲老土，我就完全唔介意，話造型愈核突愈好，後來佢再俾一副眼鏡我，我覺得啱晒！咁先俾到觀眾新鮮感，我都更易投入角色。」

戲中嘅Aimee堅決守護一段異地戀，現實中佢喺多倫多長大，回流香港發展，都有過類似經驗。「好像老公唔應該聽⋯⋯我都試過遠距離戀愛，所以可以體會到當另一半唔喺自己身邊，嗰種失落同無助。嗰時我隻身嚟香港追尋夢想，每晚拍完戲返屋企，要一個人獨對四面牆，冇一個可靠嘅人喺身邊。」

當時嘅寂寞已經係過去式，o依家嘅陳太一臉幸福，拍完戲仲有老公同三個可愛子女等佢，點會Lonely？

阿Mark話好欣賞導演嘅處女作《王家欣》，所以要把握同佢合作嘅機會。

除咗唔同性質嘅愛情，導演嘅作品另一大特色，係帶出獨有嘅香港情懷。

電影劇本係導演（左三）同太太王沛然（中）嘅作品，早前佢哋與兩個囡囡，同湯怡（右一）參與謝票活動，仲順便為導演慶祝生日。

甜品成雙，分別係蓮蓉西米焗布甸，同精美甜點。

 

大富大貴炒飯，飯炒得既乾身又唔油膩，極考功夫。

阿一海景飯店
地址：銅鑼灣謝斐道535號Tower535 25樓
電話：91006111