為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 05 月 24 日

話15%土地短期推出 土地小組斷估無痛苦

土地供應專責小組(土地小組)嘅諮詢大龍鳳上月底正式開始,搞完一輪工作坊同座談會之後,話咁快嚟到第二階段嘅諮詢。專責小組打算喺本周六起,透過網上、巡迴展覽,以及電話訪問嘅方式收集意見,小組主席黃遠輝透露,周六會喺三個商場擺街站做巡迴展覽,向市民派問卷,收集意見。

之前已經有人質疑擺街站收集意見嘅效用,話持份者可以拉大隊去做問卷,容易製造「假民意」。據了解,土地小組之前開過幾次會,討論點樣設計問卷,敲定十足十「點心紙」咁嘅問卷,列晒十八個土地選項,要求受訪者自行剔選,揀點樣湊夠一千二百公頃土地,毋須排列優先次序。

有人質疑說:「其實無意思嘅,要湊夠數有幾難?問題係選項實際上可唔可行?如果受訪者揀晒之後,先發覺根本行唔通,咁揀嚟係咪嘥時間及公帑?」

而且每個選項到底能夠提供幾多用地呢?小組始終未有具體研究。咁叫人點砌夠數?不過斷估無痛苦,土地小組竟然採用靠估嘅方法。據悉,土地小組開會討論,假設每個短中期選項,有一成半嘅用地喺短期、即十年內推出市場;三成嘅用地能夠喺十五至廿年內推出。

舉例說,發展棕地一共涉及一千三百公頃,表面睇揀呢一項已經達晒標,但原來當中有五百四十公頃土地,已經納入政府唔同嘅新發展區規劃,剩下嘅七百六十公頃又涉及重置作業者嘅問題,七除八扣只有一成半、即一百一十四公頃用地有望十年內推出;二百二十八公頃唔遲過二十年推出。

小組靠估斷定一成半土地能夠十年內推出,誤差性令人質疑,好易出現高估及低估情況。「最慘係如果高估咗,就畀公眾過高嘅合理期望,以為好快解決到土地荒。一旦發現估多咗,甚至根本係唔可行,公眾就好失望,並遷怒喺政府身上。」有政界消息人士擔心說。

據悉,唔少政府官員都擔心,土地小組開咗張無辦法兌現嘅支票,一旦「彈票」隻鑊又係落喺政府度。

土地小組搞完一輪工作坊同座談會之後,話咁快嚟到第二階段嘅諮詢,將於本周六起,透過網上、巡迴展覽,以及電話訪問等方式收集意見。

 

棕地七除八扣只有一成半、即一百一十四公頃用地有望十年內推出。

 

四大短中期覓地選項包括回收粉嶺高球場等私人遊樂場契約用地,仲假設能收到一成半用地。