為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 05 月 26 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

叙福樓的兩代掌舵人

記得三年前喺呢個欄同叙福樓集團(1978)創辦人黃耀鏗、黃傑龍父子飲茶傾偈,當時佢憶述自己一九六二年十九歲時落嚟香港,到埗不久就喺上環做酒樓售點員,自此同飲食業結下不解緣。上星期,阿仔帶領集團完成招股,上市在即,將老父嘅飲食王國帶到新階段。

黃耀鏗喺七、八十年代開咗麗閣酒樓、嘉禾酒樓和淘大酒樓,當時可謂紅極一時,據佢話生意好到要喺知客後面放個「全院滿座」牌,非常誇張!之後在一九八六年喺窩打老道首次用「叙福樓」呢個品牌開中餐廳,至今已超過三十載。

集團主席兼行政總裁黃傑龍接掌後挑起改革嘅擔子,在原有中菜基礎上,加入新品牌和亞洲菜系,特別係好受年輕食客歡迎嘅日本料理牛涮鍋、牛角、温野菜等,以及韓系柳氏家。現時在香港共有三十四間餐廳(六間中菜及二十八間亞洲菜餐廳),成為全服務、多品牌餐廳集團。以收入計,二○一七財年中菜餐廳貢獻三成五,亞洲菜佔近六成三。

叙福樓第二代掌舵人黃傑龍本身係工程師,在路政署工作過兩年,其實非常享受服務市民嘅公僕生涯,但加入家族企業後並冇依循政府按本子辦事嘅作風,反而大加改革。黃傑龍在敘福樓以外建立其他自有品牌,並引進日韓特許經營品牌,但品牌多都有機會增加管理困難,影響規模效益,所以佢積極將餐廳業務標準化,並集中管理以提升效率。

至於佢大力發展日本料理,從公司財務數據可以搵到原因。二○一七財年,公司中菜餐廳顧客總數一百八十三萬人,亞洲菜共一百四十四萬人,而顧客人均消費就分別為一百四十四港元(中菜)和一百八十五港元(亞洲菜)。論盈利能力,中菜分部毛利率由二○一六財年約百分之十點九降至二○一七財年的百分之六點四;但同一時間,自有品牌亞洲菜毛利率雖下降仍有百分之十三點一,特許經營品牌亞洲菜則有百分之十二點七。

香港人鍾意外出開餐,特別係節日或遇到喜慶事更加係大擦一餐嘅理由。當然,餐飲業唔似得股市、地產咁大幅飆升,但市場過去四年一直溫和增長,由二○一三年九百七十億港元增長至二○一七年一千一百二十七億港元,複合年增長率百分之三點八;估計由二○一七年到二○二二年增長率會有百分之四點二。

香港係美食之都,所以餐飲業市場亦比較分散。以二○一七年收入計,叙福樓集團佔所有全服務餐飲集團市場份額百分之一點八,行業排名第五;日本料理更加佔百分之七點九,排行第二。日本料理仍有發展空間,難怪公司集資最多二億六千萬港元,所得一大部分會用來拓展日本餐廳。當然,對小股東嚟講,公司承諾上市後會分派不少於五成稅後利潤,亦係亮點之一。

叙福樓由黃耀鏗(中)創辦,後來到兒子黃傑龍(左)接手業務,再大力發展日本料理。