為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 05 月 20 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

耀Sing搶Fo

要時刻保持對事業嘅熱誠,並唔容易,尤其喺五光十色嘅娛樂圈,要長期成為焦點,更加係高難度動作。關楚耀(Kelvin)入行十二年,已經歷盡高低起跌,難得佢依然有一團火,繼續透過音樂打動人心,仲即將喺26日舉行演唱會,以好歌搶Fo。

今次「Paco巨星飯堂」,我就帶Kelvin去到位於利園二期嘅「Seasons」,品嘗特色法國菜,細說演唱會嘅準備情況。

下周開Show嘅Kelvin,o依家已經進入作戰狀態,為演唱會全情投入。

 

五年首Show

Kelvin係我其中一位世姪,見到佢喺樂壇嘅成長,到o依家再次開show,佢嘅努力都值得被讚賞。而且今次嘅演唱會,佢仲會挑戰自己,「今次嘅演唱會,有一半嘅歌係別人的歌,我主要係想同樂迷更加親近,所以就喺麥花臣場館做。我已經有五年冇開演唱會,冇見歌迷都有一段時間,我希望可以藉住今次嘅演唱會,帶出同歌迷嘅集體回憶。」

另外,Kelvin啱啱推出咗新歌,佢話:「出街嗰陣遇到歌迷,佢同我講自己細個嘅時候,已經聽我嘅歌。喺開心嘅同時,我又諗,原來我都已經步入前輩級歌手嘅階段。

「我相信仲有中學生會識我嘅,我諗我啲歌可能都係陪住佢哋成長。不過,我o依家已經唔係『哥哥』級,係『叔叔』級人物。早排我出席慈善活動,有個爸爸叫自己個四五歲嘅囡囡同我合照,佢就係叫我叔叔。」

哈哈哈!但音樂又點會有年齡界限?所以Kelvin正專心進行籌備工作。「今次首次同音樂總監Edward Chan合作,仲發現原來自己唱歌好差。好多位佢聽完會擰頭,話可以再好啲,仲會慢慢解釋俾我聽,都學到唔少嘢。」

我帶Kelvin去到位於利園二期嘅「Seasons」,品嘗特色法國菜,細說演唱會準備情況外,仲暢談近況。

 

藍龍蝦配皺葉甘藍及鴨肝汁,鴨肝汁更能帶出藍龍蝦嘅鮮甜。

 

為咗演唱會,Kelvin梗係毫無保留,既錄新歌又keep住狀態,到時施展渾身解數。

 

餐廳提供$1,268特色套餐,共八道菜式。包括白蘆筍配奶凍及小番茄汁,清新怡人。

 

三文魚他他配魚子醬及芥末蛋黃醬,由擺盤到入口嘅味道,都一樣精美。

 

藍龍蝦配皺葉甘藍及鴨肝汁,鴨肝汁更能帶出藍龍蝦嘅鮮甜。

 

迷上攝影

進入開show月,Kelvin並唔算緊張,仲會同伯父泰迪羅賓jam吓歌,佢仲將實況po上ig,同網友分享。「大概三年前,我試過有感情低潮期,同女朋友分開咗。嗰時想搵啲興趣去分散自己嘅注意力,於是就買咗一部相機,無師自通去攝影,睇吓人哋嘅作品,自己又實習吓,慢慢就覺得,透過鏡頭去睇呢個世界,會有特別嘅一面,到o依家我日日都帶埋部相機出街o架。」

Kelvin嘅「攝獵」範圍甚廣,日常生活都機不離手。「我好鍾意去旅行,無論喺香港定外地,我都鍾意影低一啲moment,到之後睇番嗰張相,我都可以諗番起,影相嗰一刻自己嘅心情、感覺。」

因為同前女友分手,令Kelvin愛上攝影,透過鏡頭留低屬於自己嘅每一刻。

 

近年Kelvin嘅愛好係旅遊同攝影,喺佢嘅鏡頭下,捕捉到富士山下,足球小將們嘅追夢熱誠。

 

生活隨影係Kelvin另一取材角度,留低伯父泰迪羅賓(右二)Jam歌嘅英姿。

 

樂友如胡鴻鈞同林奕匡,都係Kelvin嘅「攝獵」對象。

 

焦糖慕絲配紅莓醬及朱古力醬,甜而不膩。

 

日本草莓啫喱及荔枝雪葩,令味蕾感覺煥然一新。

 

操Fit應戰

演唱會係Kelvin另一個重要moment,佢透露近日已經進行緊密嘅操練,又開始食蛋白餐,希望增加肌肉,保持狀態。

「雖然演唱會未預會有脫衫環節,但如果到時粉絲嘅反應熱烈,我都會徇眾要求去做嘅。o依家都差唔多達到我嘅目標o架嘞,但我會keep住操嘅。我冇特別去計磅數,但自己feel到以往嘅狀態同體能都返晒嚟,應付演唱會一定冇問題!

「食嘢就更加要小心,我之前已經開始一日食廿隻蛋白,令身體有多啲肌肉,着衫好睇啲,萬一到時mood到,真係喺台上面除衫,都唔會冇美感吖嘛。」

操肌已係近年大氣候,而且開Show在即,Kelvin更加不敢怠慢。

 

不論男女,專注嘅時候係最有魅力嘅,睇Kelvin就知。

 

牛柳及鴨肝配烤薯仔,色香味俱全。

 

雞肉慕絲釀羊肚菌配蘆筍,羊肚菌吸收晒雞肉慕絲嘅精華,兩者配搭出特別嘅層次感。

 

田雞腿配小麥米,田雞腿嫩滑juicy。

 

Seasons
地址:銅鑼灣恩平道28號利園二期3樓308-311號舖
電話:25056228