要求三七分帳　鄉事派圖賣「祖堂地」分家內幕

土地供應專責小組嘅諮詢工作一開鑼，率先安排見鄉事派人士，就放寬俗稱「丁地」嘅「鄉村式發展用地」建築密度諮詢佢哋嘅意見。有關地帶原本預留來興建三層高嘅丁屋，據悉，鄉事派與土地小組主席黃遠輝會面時，多次表示希望政府開綠燈畀丁屋起四層或以上。

鄉議局主席劉業強之後公開表示，可同時考慮釋放村界外嘅鄉村式用地，「官鄉合作」發展為高層丁屋及公屋，仲話鄉事派樂意「犧牲小我」讓出佔地幾公頃嘅上水天平山村起屋。

放寬丁屋發展密度對鄉事派有利，佢哋固然極力爭取，但同時籌謀緊另一個更肥嘅大計。據悉土地小組日前收到一封鄉紳寫嘅信，內容係游說政府收購新界「祖堂地」。所謂嘅「祖堂地」係指新界各族群祖先留低嘅公家地，不屬於個人擁有，族群內男丁都有業權，有說現時新界三分之一嘅土地係「祖堂地」，面積共約二千公頃。

消息人士講，鄉紳想賣「祖堂地」畀政府，講到底係佢哋想分錢。開價方面，據了解目前「祖堂地」嘅市價每呎約值一至三百蚊，但鄉紳們向政府開價一千蚊呎。

消息人士解釋，呢個訂價係根據《收回土地條例》嘅賠償機制，該機制將農地分為四級賠償呎價，由三百一十二蚊至逾一千蚊不等，「我哋o依家一律定為一千蚊係有根據。當然有價講嘅，但一定唔可以低過五百蚊呎。」

但同時，鄉紳們仲有一個附帶條件，就係要政府將日後落成嘅房屋，分三成利益畀原居民，「到底係分三成單位畀原居民，抑或分三成租金或賣盤收入，鄉紳們仍在考慮中。」佢哋解釋，《基本法》第一○五條講明，「徵用財產的補償應相當於該財產當時的實際價值」，「日後如果發展成私樓，呎價上萬蚊，但原居民只以呎價千元賣地，兩者差太遠啦，一定要對分先得。」

消息人士認為，呢個建議對政府也有好處，「政府搵地爆頭，只要肯買我們的祖堂地，就即刻達標。重點係咁做唔會畀人話係官商勾結，我哋又唔係發展商或大財團。只要日後集中用祖堂地興建公營房屋，市民得益，公帑自然使得其所，無理由會畀人鬧。」不過，亦有評論認為鄉事派嘅開價係趁火打劫唔討好。

土地供應專責小組諮詢工作一開始，主席黃遠輝就約見鄉議局，該局主席劉業強建議官鄉發展村界外嘅用地。

有指新界三分之一嘅土地係「祖堂地」，約二千公頃，鄉事派圖以呎價一千蚊賣畀政府。

鄉紳希望政府放寬丁屋發展密度，准丁屋起超過三層高。