由「死摩囉差」說起

港鐵自從有了關愛座，便爭議不絕。世界各地都有網民擺片上網，批評別人不讓座，有的甚至因此大打出手。早前美籍印裔的無綫主持褚簡寧（Michael Chugani）（圖右）在港鐵列車上，勸一名女士將關愛座讓給一位九十一歲老婆婆，怎料女士拒絕。褚簡寧即刻網民上身，想用手機拍下呢位不願讓座女士的容貌，女士也不是省油的燈，反拍佢之餘更唸唸有詞，指褚簡寧係「死摩囉差」。

褚簡寧係土生土長香港人，講廣東話純正過好多人，不過佢因為呢件「義舉」爆紅，喺街行都有人搵佢合照。港鐵大可諗諗搵佢做「關愛大使」，宣傳關愛座。

喺外國，公共交通工具好多都設有關愛座或優先座，意思係呢啲位係畀有需要嘅人優先使用。咩係有需要嘅人？廣義就係孕婦、長者、傷健人士等。只是這良好的本意，往往因讓不讓座的問題演變成批鬥，關愛盡失。而這現象並非香港獨有，網上甚至有人說，關愛座已變成老人和年輕人對立的戰場。有的老人家大條道理批判年輕人不肯讓座，而年輕人有的就話開工企足九個鐘都唔畀坐，甚麼道理？

爭拗的焦點，似乎去咗「我」為甚麼無權坐？「我」點解要讓人坐？一切以自己需要為主導，看不到別人。

當年有長輩教禮讓之義，佢話搭車搭船見位坐低係天經地義，只不過當你望到有老人家、有人拎着重嘢上車，就自然應該彈起身讓畀人，後生仔企下無乜所謂。當年沒有劃分特殊座位，更沒有手機令你「頭耷耷」睇唔到人；所謂禮讓，是從心出發，觀察四周並照顧別人的需要。

關愛座是規矩，禮讓是自發的修養，如果人人都有推己及人的公民意識，基本上每個座位都係關愛座，也不需要由政府自上而下呼籲。眼見唔少家長容許甚至鼓勵仔女霸位畀自己，甚至叫仔女企喺關愛座前，待有人起身讓座即自己坐上去，更讚仔女「醒目」。這種教導下成長的小孩，可能也只會從「我」出發，以方便自己為主。

其實這城市的人沒禮貌何止不讓座？行街時迎面撞過來有之，出入時不順手扶着大門等下一個人通過有之，這世代，似乎「我」愈來愈強，卻看不到「你」和「他」了。