中藥股發威

我一向相信中醫藥，呢門傳統學問源遠流長，對於調理身體，提升自身自愈能力，都能夠同西醫藥互補長短。但話雖如此，我覺得中藥同西方藥物相比，有兩點局限咗佢嘅發展，第一係中藥嘅醫學數據和藥理實證唔夠西藥咁精準充分，其二係服用無咁方便。

根據二○一七年金融時報資料，全球生化藥物產業總值接近一萬億美元，其中市值最高嘅公司係美國強生（Johnson & Johnson），舊年市值約三千五百六十億美元，著名美國藥廠輝瑞（Pfizer，二千零九十億美元）和默克（Merck，一千七百九十億美元）排行第四和第五。事實上，美國係生化藥業嘅王者，十大公司裏面七間係美企，其餘瑞士佔兩間，法國一間。

有人話，藥廠生產第二粒藥成本可能只係幾仙，中間利潤驚人，但係第一粒藥嘅成本就數以億計，中間牽涉嘅研發和臨床昂貴且耗時。長期研發和臨牀固然係衞生部門對藥物註冊嘅要求，但係亦令西藥鞏固科學化、有實證嘅全球形象，呢點中藥可借鑑。

近年中藥在古方基礎上不斷加以改良和調節，在華人地區以至西方國家都愈來愈受信賴，認為可以調理身體，從根本改善體質，而且成分天然。不過，以往中藥始終欠缺準確嘅藥效實證。例如點解用三錢呢樣加兩錢嗰樣，五碗水煲成三碗就會達到藥效？而且中成藥嘅製作能否保持統一品質和藥效，都令人有疑慮。

最近有機會參觀過中國神威藥業集團（2877）嘅研發生產基地，令我對中藥業發展有新睇法。神威藥業係中國最大現代中藥注射液及軟膠囊製造商，產品針對中老年人、抗病毒及兒童用藥，目前有七十五種藥被列入國家醫療保險產品目錄。在科研方面，公司精確立項研發有獨有療效嘅中藥，聚焦慢性病，特別係西醫暫時無法解決嘅領域，例如神經退行性疾病（包括腦退化）、心腦血管疾病等。其中腦退化創新藥三期臨牀已在進行中。

針對中藥生產規範化和現代化，神威藥業不斷探索新技術，已採用動態逆流提取、注射液洗烘灌封生產等，應用電腦控制，令中藥生產逐步達到安全、有效、穩定、可控等現代標準。

另一方向係令中藥服用更方便，所以公司研究由原材料提煉出特定療效成分，發展注射液、口服藥為主嘅產品，更貼近現代人生活模式。

公司二○一七年淨利潤下降百分之二十三，但下半年業績已見好轉，今年首季營業額按年增加百分之六十八至六億七千萬元人民幣，可見公司積極拓展銷售建功。大摩亦上調公司目標價，認為神威藥業基礎有所改善，今明兩年將出現轉向。而內地約十個省份取消對「神威」品牌注射劑報銷限制，配方顆粒業務在產能擴張後前景亦睇高一線。我期待中藥業不斷進步，藥股在未來發圍兼發威。