為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 05 月 10 日

張繼聰「型」警細佬夠鬼馬

近年轉戰拍電視劇嘅張繼聰,令人睇到佢嘅喜劇感,原來佢個警察細佬張繼安(阿安)都一樣有。現為警察公共關係科(PPRB)警員嘅阿安,日前化身「升級報道員」,喺香港警察嘅facebook拍咗條片,呼籲入迪士尼睇五月天演唱會嘅觀眾,要留意須知,條片仲串連多首五月天嘅歌名,不但貼地,加上佢嘅鬼馬演繹,相當吸睛。

據東姑所知,阿安喺○六年一月加入警隊,曾經駐守上水分區及機場特警組(ASU),後來調職至PPRB。就連警隊刊物《警聲》都曾經介紹過佢,當時佢仲駐守上水分區,代表香港遠赴匈牙利布達佩斯,參加由當地警察教育及訓練中心暨警察體育協會主辦嘅國際警察搏擊大賽,在男子七十六公斤級別取得亞軍。

唔知係咪有個明星阿哥,阿安唔怕對鏡頭,故調職做PPRB後,都多同傳媒打交道,之前二月嘅大埔公路巴士車禍,當時佢都喺現場,當時有電視台記者要求「俾多三分半鐘」做live,佢即反駁:「新聞自由係重要,但可能有人命喺裏面。」此外,阿安近年都拍咗唔少宣傳滅罪訊息嘅片,演出都幾抵死,所以都儲咗幾多粉絲,分分鐘有助提升警隊親切形象。

阿安喺五月天演唱會嘅交通安排短片上,表情多樣化,又手指指,惹得不少網民留意。

 

阿安喺「估你唔到‧連佢都玩單手掌上壓挑戰」條片上,阿哥張繼聰都有粉墨登場,擺明明撐細佬。

 

張繼聰細佬張繼安近日被網民追捧,能文能武,陽光氣息十足,絕唔輸畀阿哥。

 

正經又得,鬼馬都得,佢着到一身鐵騎look,佢嗰棚牙加埋啲笑容,相當親切。