為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 05 月 13 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

多Click之虎

好劇集加上網絡嘅發達,造就網絡劇集市場愈見蓬勃,近期喺網絡大熱嘅《飛虎之潛行極戰》,今周嘅點擊率已經突破二十億大關,成績斐然。

今次嘅「Paco巨星飯堂」,我就特別誠邀劇集嘅掌舵人樂易玲樂小姐,率領吳卓羲(Ron)、陳凱琳(Grace)同梁烈唯,去到位於灣仔嘅「新榮記」,品嘗米芝蓮星級高端中菜,暢談台前幕後嘅點滴。

喺樂小姐(右二)嘅精心統籌下,《飛虎之潛行極戰》已經獲得超過廿億嘅點擊率,成績斐然。佢表示男主角之一阿Ron、Grace同唯唯(左至右)等一眾演員,都有超水準演出,劇集於下周一起播出,令廣大觀眾都可以欣賞到呢部出色劇集。

 

精心打造

樂小姐身兼多職,既為TVB助理總經理(藝員管理及發展),又係邵氏電影執行董事及總經理,今次由佢率領團隊,同「優酷」合作製作劇集,選擇以飛虎隊為主題,都係佢嘅心思。「飛虎係電視、電影都拍過好多次嘅題材,但係仍然咁受觀眾歡迎,就知呢個題材有好多發揮空間。今次我搵埋最好嘅團隊,有啲仲係電影人添,去塑造新嘅人物,寫好嘅劇本,去吸引觀眾,令佢哋有追睇慾。」

成績勝於一切,劇集o依家嘅點擊率已經超過二十億,數字仲時刻增長中,男主角之一阿Ron,就梗係開心,同時佢亦有所感觸。「我飾演O記嘅督察,同Bosco(黃宗澤)係同父異母嘅兄弟,今次係我同佢時隔十五年再合作,對上一次已經係《英雄.刀.少年》。我覺得我哋兩個都成熟咗好多,喺演繹角色上都進步咗,真係似番個男人!」

哈哈哈!樂小姐都大讚兩位男主角嘅表現出色,而佢點名演奸角Kenny嘅唯唯,亦借機會感謝伯樂。「我一直都好想演奸角,但係好多人都話我個樣細個,做唔到奸角,但係樂小姐就唔介意我呢個缺點,放心交Kenny呢個角色俾我,真係好感恩。」

我同一眾貴賓,去到位於灣仔嘅「新榮記」,品嘗米芝蓮星級高端中菜,暢談《飛虎之潛行極戰》嘅點滴,仲跟餐廳老闆張勇先生(中)合照,度過開心嘅一晚。

 

劇中嘅飛虎隊員都操fit身形配合演出,連唯一嘅女隊員王敏奕(右二),都操出腹肌。

 

三哥苗僑偉再飾演警隊高層,入型入格。

 

蜜汁紅薯($128),作為前菜嘅紅薯炆煮得極為軟淋,沾上絲絲蜜汁,彷似宮殿甜點,口感綿密細膩。

 

北京烤鴨($798/隻),皮脆肉嫩,薄餅薄而輕巧,沾上六必居嘅醬汁跟一系列蔬菜,地道嘅京式風味,不設例牌,只提供原隻。

 

黃金脆帶魚($498/例),只取中間最嫩滑嘅魚身,去頭去尾後,每份足足用上三條,除鹽以外無添加其他調味料,味道卻叫人念念不忘。

 

談情「世交」

一部陽剛氣息咁重嘅劇集,女演員就顯得「彌足珍貴」,Grace喺戲中飾演法醫,佢都嚴陣以待,做足功課。「我知道要做法醫嘅時候,特別睇咗三季美劇《Body of Proof》(法證伊人),去揣摩吓做法醫嘅細節,點知後來開工,我先發現自己得幾場驗屍戲份,不過都係一個好好嘅經驗嚟嘅。」

Grace嘅另一個「任務」,就係同阿Ron談情。「到入行後我先發現,原來我哋嘅媽咪係識得嘅,但係到呢套劇之前,我哋都冇合作機會。因為我喺劇中好少動作戲,主要都係廠景或者文戲多,同阿Ron啱啱相反,所以佢每次開工見到我,就知嗰日唔使打,可以好舒服咁演戲。」

樂小姐對Grace嘅表現都讚不絕口,「佢進步咗好多,雖然要避免劇透,但我可以預告,佢每場戲做得好好,值得注意。另外,Grace焗蛋糕仲好叻,好多時過節,佢都會親手焗蛋糕,請我仲有其他同事食o架。」

Grace表示其母同阿Ron媽咪係舊識,令之前未合作過嘅佢哋,多咗一份淵源。佢身穿嘅潮Tee,乃嘉玲姐所贈,Tee上為嘉玲姐嘅童年照。

 

阿Ron同Grace喺劇中有感情線,後者話喺演出求婚一幕時,相當有感覺,觀眾要加倍留意。

 

榮記蘿蔔片($168/例),將高山蘿蔔炆上二十分鐘左右,清甜無渣,係家常菜嘅極至。

 

沙蒜豆麵($298/例),屬台州沿海家鄉菜,沙蒜即海葵,有壯陽之效,粒粒爽口,薯粉順滑彈牙。

 

家燒東海黃魚(時價),為招牌菜中嘅招牌菜,魚湯微辣開胃,加上一碗東北石板米飯,可謂一絕。

 

榮記花膠黃魚羹($598/位),魚湯未有煮得非常黏口,小黃魚肉相當滑溜,奶香味喺口腔揮之不去,就好似飲用一碗美顏液。

 

辛辣回憶

講到食,阿Ron話自己嗜辣,亦都愛同好兄弟分甘同味,所以就發生咗一件同唯唯有關嘅趣事。「有一次我去美國,買咗啲俾錢前要先簽生死狀嘅辣醬,一支支好似『Tabasco』咁嘅,因為佢係堅辣,真係辣到會有人頂唔順嗰隻,所以就要啲客簽生死狀先會賣。我就OK嘅,仲覺得好正添,於是有一次阿峯約我哋去佢屋企食飯,我就帶埋去俾佢哋試吓。」

唯唯即刻接話:「我見到以為冇乜嘢,阿Ron話好辣嘅,叫我點少少試吓先,我就點多咗,一入口⋯⋯跟住我成個額頭已經標晒汗,又講唔到嘢,成個人hang咗機咁。阿峯見唔對路,係咁俾鮮奶我叫我飲,到過咗起碼二十分鐘,我先講得番嘢,嗰支嘢真係堅!」

今晚美食當前,亦不乏香辣菜式,可以滿足阿Ron同唯唯兩名唔同「辣Level」嘅嘉賓,同支「生死狀辣醬」一樣咁堅!

見到自己首次監製嘅劇集,點擊率咁出色,樂小姐都喜上眉梢。

 

唯唯落力演出,最溫馨係佢十五個月嘅囡囡捧爹哋場(左圖),冧晒!

 

唯唯嘅Kenny哥造型,一睇就令人留下深刻印象。

 

鯧魚焗飯($498/例),鯧魚煮得惹味,東北石板米粒粒分明,食起嚟有啲似臘味飯。

 

辣燒水潺($298/例),水潺即九肚魚,味道辣歸辣,但只到舌尖不到喉嚨,水潺滑不溜口,每口都留下深刻印象。

 

新榮記
地址:灣仔駱克道138號中國海外大廈地下及一樓
電話:34623516、34623518