郭晉安視帝NG勁「耍冧」

無綫三屆視帝郭晉安（安仔），近排忙住為新劇《白色強人》開工，以為喺戲入面飾演醫院高層嘅佢，應該涼住冷氣拍得好「他條」至係。點知嗰日東姑探班，佢喺政府總部嘅公民廣場拍外景，場戲都幾「苦過dee dee」。

話說呢一場戲，安仔着晒西裝只係行行企企，不過，弊就弊在係落雨場口。現場有一大部水車射水造雨，可憐安仔拍攝時，差唔多半邊身照頭淋咁滯，其他工作人員，仲有雨衣遮擋下；而佢只能夠趁埋位前中間空檔，自己走埋一二邊避下。又或者，見佢借下啲毛巾抹下褲腳咁，好彩近排天氣回暖，否則冷天淋雨就仲慘、仲甘喇！

而安仔不愧為三屆視帝，拍攝時專業精神可嘉，一啲都冇話「揸流攤」，求求其其hea住做。好似有場戲，東姑見安仔同一個特約演員有對手戲，雖然好簡單咁由對方遞把遮畀佢，但係佢就唔小心企錯位，搞到NG；於是，佢即刻笑笑口唔好意思，仲同對手及班幕後勁「耍冧」，完全冇話耍大牌「側側膊」，或者諉過於人，呢啲態度真係好值得畀個like佢！

安仔喺新劇《白色強人》中，飾演醫院嘅醫生高層，仲以為佢只有文戲，拍得好「他條」。

點知，現場有水車不斷射水造雨，雨勢仲要幾大下，淋到安仔濕晒身，好彩天氣回暖，如果唔係分分鐘冷親。

淋到褲腳濕晒嘅安仔，工作人員立即畀條毛巾佢抹下、整理下，唔使佢變落湯雞。

就算貴為三屆視帝，安仔都冇擺款擺架子，NG就笑騎騎咁認「矮仔」，抵讚！

相信安仔喺企位上有小小出錯，搞到NG，佢於是猛向工作人員「耍冧」。