為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 05 月 06 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

刑偵23情

好戲好劇好歌猶如紅酒,時間愈久愈見醇厚,如果唔係近日深夜重播嘅《刑事偵緝檔案》系列,都唔會輕易成為網友熱話啦!廿三年人事翻新再翻新,但「大勇」陶大宇狀態依然;劇中嘅萌代表「棠棠」,都已經變成宅男女神美棋BB。

今次「Paco巨星飯堂」,我就帶兩位嘉賓去到位於灣仔嘅「御進私房菜」,品嘗性價比高又高質嘅中菜,暢談《刑偵》嘅點滴及近況。

大宇同美棋BB喺廿三年前嘅《刑事偵緝檔案》1、2中合作,雖然二人嘅對手戲唔多,但當中大宇勇救當時只得四歲嘅美棋,後者話對拍攝嗰幕嘅情形,仍然歷歷在目。

 

封「環保之星」

大宇甫坐定,就話:「Paco,我喺你嘅專欄入面,應該都係『環保之星』。」正當我想問佢原因時,佢表示:「之前《大時代》重播,我就以其中一隻蟹嘅身份做嘉賓,o依家又係因為重播,我又做嘉賓嘞!循環再用仲唔係『環保之星』,哈哈!」

哈哈哈!咁只係證明好劇集係冇時間限制,今次《刑偵》重播,仍然有話題。大宇仲分析今昔對比。「以前嘅劇集,好似呢套咁,有好多演員參與,劇入面有好多枝節去豐富劇情,o依家就多數圍住一生一旦去發展故事,比較單調啲。」

所以重播都有大把捧場客,除咗主角,拍劇時只有四歲嘅美棋,都俾網友大讚Kawaii同好戲,當事人表示:「好多人以為我嗰時咁細個,好多嘢記憶都會好模糊,但係我都記得幾清楚,好似《刑偵1》大宇哥救我嗰幕,拍之前有導演同我講,叫我喺個箱入面眯埋眼扮瞓覺就得,呢一幕我仲記得個畫面。」

我帶兩位嘉賓,去到由阿一楊貫一高徒黃隆滔開設、位於灣仔嘅「御進私房菜」,品嘗高質中菜,暢談《刑偵》及近況。

 

喺正在播映嘅《刑偵2》中,主角大宇固然孭重飛,周旋於兩大女主角之間(上圖);美棋就負責「萌戲」,當時佢仲同「媽媽」、「阿姨」及鄭秀文合照留念。﹙下圖﹚

 

 

 

我帶兩位嘉賓,去到由阿一楊貫一高徒黃隆滔開設、位於灣仔嘅「御進私房菜」,品嘗高質中菜,暢談《刑偵》及近況。

 

柚子蝦餃($16/件、需預訂),薄皮內為帶柚子味嘅餡料,夠晒開胃;配上櫻桃鵝肝($268/6件、需預訂)﹙下圖﹚,實為頭盤黃金組合。

 

 

 

惜福每一天

廿三年下來,大宇記得期間同美棋喺另一劇集《影城大亨》合作,後者飾演童年時代嘅劉嘉玲,之後雖然冇保持聯絡,但今次佢哋為專欄擔任嘉賓,即時互相「抄牌」,方便日後「Re-U」。

近年主攻內地市場嘅大宇,享受毋需日夜顛倒拍劇。「好似拍《刑偵》嗰時咁,日踩夜踩、外景接廠景再接外景嘅生活,我未必handle到嘞。o依家喺內地拍網劇、網大,揀啱劇本先拍,舒服好多,又有多啲時間陪屋企人。以前要搵錢係咁拍嘢,忽略咗好多嘢,o依家要補償番,我媽媽九十幾歲嘞,有病痛好平常,所以我更加覺得,要俾多啲時間照顧佢。」

愛情生活穩定嘅美棋,講到事業就話:「我去年返番TVB,跟住就主持咗《誇極限大挑戰》,o依家都係以主持節目為主,播緊嘅有《生活100錯》同《大玩特玩》,嚟緊我會上《美女廚房》做嘉賓,煮嘢食我都OK嘅,我有信心唔會燒咗個廚房!哈哈!」

近年大宇主力發展內地市場,閒時就同已屆九十多高齡嘅陶媽媽,樂敍天倫,生活愜意。

 

去到大宇嘅境界,自然可以選擇性接job,去年佢就為老友錄歌,友情至上。

 

早前大宇(右三)將童年照放上微博,可以話小大宇萌過美棋!

 

招牌濃湯翅(100克)($398/位、需預訂),濃湯以八隻走地雞熬煮而成,性價比極高。

 

私房一夜情小黃魚(198/份、需預訂),以秘方調料醃製一晚後,再將黃魚炸得香脆,十分惹味。

 

蠔皇珍寶鵝掌($78/位、兩位起)配蠔皇扣日本26頭皇冠吉品鮑魚($1180/位、需預訂),係味覺嘅最抵享受,鮑魚煮得溏心,鵝掌入味。

 

高手Sudden Test

今晚我帶大宇同美棋,去到「御進私房菜」,老闆包括阿一楊貫一高徒黃隆滔,及放棄高薪厚職、前國金軒主廚鍾志強(Jacky)。前者盡得師父真傳,炮製嘅鮑魚必定係溏心;後者擅長製作新派粵菜,炮製矜貴食材絕對係「piece of cake」。

我就俾個突擊測試Jacky,只容許大廚以葱及蒜作配料,製作一個炒即食麵。近年我愛上品嘗唔同種類嘅麵食,當中炒即食麵好多時會考起大師傅,因為控制火候、油份、保持麵嘅質素,實在係難以兼顧,要做到入口「條理分明」,真係唔容易。

而Jacky亦冇令我同兩位嘉賓失望,麵條入口彈牙,葱蒜味道掌握得宜,抵俾Like!

 

 

自去年重投TVB懷抱,美棋就主持多個綜藝節目,包括逢周六播出嘅《生活100錯》(左圖),嚟緊嘅《美女廚房》,佢都有份參與,一展身手。

 

我即場測試餐廳另一老闆兼大廚Jacky(後右),請佢處理只以葱蒜作配料嘅炒即食麵(下圖),佢嘅作品相當出色,並未因突擊測試而有落差,好嘢!

 

 

 

濃湯泡手打魚腐($198/份),魚腐以蛋白、鮫魚及鯪魚配出黃金比例手打而成,入口如棉花糖幼滑。

 

龍蝦湯泡步步米($288/份、需預訂),以大蝦煮成嘅濃湯,加上兩種質感嘅米飯,令人回味。

 

冰涼西瓜糕($16/件),外型如真西瓜,紅色部分為鮮西瓜汁、白色為牛乳,綠色則以綠茶製作,造出帶甘嘅味道。

 

御進私房菜
地址:灣仔灣仔道83號3樓
電話:25756966