真正的金句王

「當你回首往事時，不因碌碌無能而悔恨，不為虛度年華而羞恥，咁，你就可以好驕傲同自己講：你無負此生！」

八十四歲的著名導演楚原，在第三十七屆香港電影金像獎頒獎典禮獲頒「終身成就獎」，一頭白髮撐着枴仗的他，精神奕奕中氣十足拋出大堆金句，尚未「登六」的我，甚是感觸。

「回首半生青衫人老，在漫長人生中，有開心時候，困難日子都唔少，人生大概都係失意倍多如意少。」因為很早踏入社會工作的關係，我早已經歷困難多過開心的生活，但也好，鍛煉出今天頗為「硬淨」的我。

「我破咗香港賣座紀錄，老闆即刻同我簽新合同，人工加十倍，個個都話我係香港最幸福嘅導演；十幾年後我嘅戲不賣錢喇，拍完幾部仆街片，到拍《天龍八部》，開鏡前一日，方逸華小姐出來撕咗張通告，話唔畀拍，入到寫字樓第一句就問我，邊個畀你拍《天龍八部》？蝕咗本你有得賠咩？仲話我根本唔懂電影藝術，唔識拍電影，於是個個話我係邵氏公司最難堪嘅導演。」做保險經紀的時候，開不到保單，上級、客人罵我根本不懂得保險，甚是難堪。

「但係人生呢兩個字，就係歡聲、淚影四個字砌成，冇乜奇怪，任何人無論昨日幾風光、幾失意，聽日天光一樣要起身做番一個人，繼續生活落去，明天總比昨天好，呢個就係人生！」所以，我會向前望，不會眷戀「舊時點點點」，因為，「舊屎」，已經被廁所水沖走，是過去。

「唔講你唔知，人生原來同打麻雀一樣，有東南西北風，你打到北風時又是另一個人生，如果你好似我咁，老到無得撈喇，後生要剩番個錢呀，老到好似我咁，連終身成就獎呢個老人牌都拎埋，咁你就應該，應該咩呀……應該管它天下千萬事，閒來輕笑兩三聲！到老嘅時候，無論外面發生咩事，管它喜怒哀樂，管它恩怨情仇，全部都當佢係菩提、明鏡，笑吓就算，古今多少事，都付笑談中。」

他日小弟八十有四的時候，希望有機會向大家「回帶」，講一次楚大導這番金石良言！