長跑新勢力

愈來愈多朋友加入長跑行列。周日去了Run for Infinity，見到唔少熟面孔，包括旅發局企業事務總經理梁美寶（Cynthia），佢帶埋教練來一齊跑，堅認真。伊人近年愛上跑步，由完全跑唔郁，到十公里賽事都應付裕如。

問佢點解開始練跑？佢笑話工作應酬多，覺得自己愈來愈肥，想搵一樣運動做吓，跑步最簡單，唔使約人隨時可以做，最啱工作時間唔穩定嘅佢，不過跑咗一排膝蓋開始痛，怕整傷於是搵教練正式學，o依家有時間佢會一星期跑三次。

佢沒想到跑步能收身以外，出一身大汗嘅感覺勁正，仲覺得工作積聚嘅壓力也似乎隨着汗水排出體外，跑完一身鬆晒，令佢愈來愈鍾意跑，仲諗緊衝出香港，去世界其他地方跑馬拉松。

講番呢個比賽，今年係第二屆，都幾別開生面，地點定喺蘭桂坊，挑戰在於好多斜路同梯級，除了男、女子組五公里，最有趣係無極賽，看你在一小時內可以跑得幾遠，挑戰自己極限，吸引到唔少頂尖跑手一試實力。搞手Elco同Morrisey話希望將來有外國跑手因為呢項新意而來香港旅遊，好似港人去外國參加長跑比賽咁。　

除咗Cynthia，推廣跑步最出力嘅一定係恒生銀行（0011）傳訊及可持續發展總監張樹槐，佢又係另一個中年「出家」嘅故事；四十幾歲才開始跑步，卻不斷突破自己，呢十幾年佢跑過海拔最高嘅珠峰賽道，海拔最低（海平面以下四百三十米）的死海，每次都迫自己向前。他稱對這種Can-do spirit上咗癮，係跑過的人才知那種境界。剛完成人生第七十場馬拉松嘅佢話，已經在想下一個挑戰。

公關界好此道者除了Cynthia和張樹槐，仲有海洋公園公共事務總監Una Lau、太古集團企業事務董事唐偉邦；至於傳媒界，據說就有《明報》梁享南、《經濟日報》曾世明、《AM730》盧覺麟．馮振超、港台劉美玲等，愈來愈人多勢眾。