主頁 > 專欄 > Paco巨星飯堂 > 深宮有情 2018 年 04 月 22 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

深宮有情

觀眾煲劇會煲出感情，演員們又何嘗唔會拍出友情？即將喺下月播出嘅TVB重頭劇《宮心計2深宮計》，故事雖然離不開勾心鬥角，但幕後一眾演員就變成好友，幕前幕後對比極大。今次「Paco巨星飯堂」，就邀得四位演技派：心姐謝雪心、康華、張文慈（Pinky）及羅霖（Candy），細說「宮中」秘聞。

我帶四位嘉賓，去到位於將軍澳嘅「莆田」，品嘗特色嘅福建菜，細說《深宮》情誼。

Candy、心姐、康華同Pinky（左至右）喺即將播出嘅劇集《宮心計2深宮計》中，發揮精湛演技，鏡頭前鬥戲，鏡頭後就拍出真友情，令人羨慕。

首拍古裝

今時今日仍有唔少觀眾回味嘅《宮心計》，原來已經係九年前嘅「神劇」，有金牌監製梅小青再全力打造，《深宮計》不論卡士、故事同製作，都全面加碼。除咗有心姐歸位，佢喺戲中嘅下屬，全部都係實力派。「我喺劇中飾演嘅『章尚宮』，係『尚宮局』嘅主管，掌管全皇宮嘅大小事，而康華、Candy、Pinky同慧儀（張慧儀），就係我嘅下屬。」

康華話：「我飾演『南宮司設』，係負責宮中所有interior design，連皇帝嘅龍牀都關我事。」

至於Candy同Pinky，都係首次參演古裝劇演出。Candy表示：「今次唔止係我第一個古裝劇，仲係我十幾年嚟首次拍劇，所以我都嚴陣以待。戲入面我係負責宮中珠寶嘅『徐司珍』，拍第一場戲我已經好驚，除咗因為要適應古裝劇講對白嘅節奏，仲因為嗰場戲講我要俾馬國明同蕭正楠鬧，拍嘅時候我真係feel到自己個心跳得好快，之後我就打俾米雪，話佢知我嘅情況，同請教佢拍古裝要注意嘅事項！」

Pinky就話：「我就學到咩係『古裝笑』，初初開機嗰排，有個工作人員叫我俾個『古裝笑』佢，我唔明係乜，後來先知係唔露齒嘅微笑，因為古代人比較含蓄，唔會笑到露晒齒。我嘅角色係『汪司膳』，負責所有同食有關嘅嘢，有一場戲講我講解御膳，每道菜都有『五』呢個字，啲對白我背咗好耐！」

我帶四位嘉賓，去到位於將軍澳嘅「莆田」，品嘗特色嘅福建菜，細說《深宮》中嘅情誼。

劇集係大堆頭大製作，拍攝時間自然長，完成香港廠景時，「尚宮局五美」同兩位男主角馬國明、馬浚偉，都要合照留念。

九轉小腸（$79），食材選自豬小腸中最柔嫩一段，經過精細截取，廚師再反復沖洗一小時，保證絕對乾淨。經過鹵製之後，鹵汁香醇，再將小腸反轉塞入，一層又一層，直到沒有多餘部分。

傳統扁肉湯（$28/位），以三斤肉用木槌捶打三小時，至製成一張薄如紙張嘅扁肉皮，工序精細，風味獨特，口感嫩滑。

蝦苗拌頭水紫菜（$52），於淩晨漲潮時採摘嘅第一茬細嫩芽，才能叫頭水紫菜，其口感有別於一般紫菜，細嫩無沙，口感柔滑，於舌尖輕輕纏繞。

扯「鮮肉臂」

除咗深奧嘅對白，Pinky仲特別鳴謝心姐，「古裝戲講對白嘅節奏，仲有抑揚頓挫，初時我都冇乜概念，好在有心姐示範，又不時幫我，等我好快可以catch up到。」

心姐就話要多謝劇組，為佢安排一場摸「鮮肉」蕭正楠手臂嘅戲，令佢好難忘。「呢場戲我哋喺橫店拍嘅，劇情講我要睇吓蕭正楠嘅上臂胎記，拍嗰日落雨，搞到啲泥有過腳踭咁深，我哋嘅戲服又唔整得污糟，工作人員就鋪咗一段路俾我走位，點知我就跣腳，一跣就好快咁扯甩咗蕭正楠隻袖，但咁樣反而仲切合我嗰刻嘅心情，算係無心插柳。」