雪妮哦醒老公

現年七十二歲嘅雪妮，下嫁武術導演唐佳，唔經唔覺接近五十年嘞。雪妮由粵語片時代嘅一線女星，到o依家成頭白髮，專演婆婆、嫲嫲嘅角色；而老公啲頭髮亦甩到所剩冇幾，得番啲白鬍鬚，同白眼眉毛，兩人做到真正嘅同偕白首。兩公婆至今仍然經常出雙入對，夫妻嘅相處之道，好值得年輕一代學習。

早前，東姑搭港鐵時就巧遇佢哋，發現唐佳原來好就得老婆。當日，佢似乎好攰，坐車時猛「釣魚」瞌眼瞓；反而雪妮就鬼打咁精神，一路玩住電話，一路吟吟沉沉唔停口，嗶哩叭喇猛同老公講嘢，搞到唐佳冇得瞓。不過，唐佳唯唯諾諾，一直冇插嘴，仲苦苦撐開對眼，聽老婆大人嘅訓示。一個願打、一個願捱，睇嚟想好好維繫一段婚姻，男人遷就太太，係金科玉律。

兩公婆排排坐港鐵，雪妮不停口疑似猛向老公訓話式講嘢，唐佳就唯唯諾諾，聲都唔敢唉一下。

睇唐佳個樣好似好攰，一坐低諗住瞌一陣，點知老婆嘈住晒。

老婆大人黑晒面係咁哦，老公就一味逆來順受，可能呢啲就係長久夫妻嘅相處之道。