為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 04 月 15 日

劉德華父母買餸大陣仗

劉德華(劉華)出名孝順顧家,即使已經成家立室,同太太朱麗倩生埋囡囡劉向蕙,佢都堅持同劉爸爸、劉媽媽一齊住,方便照顧兩個老人家。早前,東姑就喺旺角街市,見到劉爸媽。兩老雖然年過八十,但老當益壯,朝朝飲完早茶,就親自去街市買餸,就算屋企有大班工人等候差遣,都唔肯假手於人。睇嚟劉華「牛」一樣嘅勤勞精神,就係遺傳自雙親。

不過,東姑所見,劉爸媽日常買餐餸,都幾大排場,一架七人車,除車住佢哋之外,一個司機、一個保鑣、一個女近身,仲有個貌似係劉華嘅胞姐,全team人負責全方位照顧兩老,可見劉華悉心安排,侍父母至孝。

女近身睇落似來自內地,溫柔細心,專責侍候劉媽媽,扶出扶入;男保鑣戴口罩,高大威猛,專責傍住劉爸爸,除咗睇落打得,仲吹得兩嘴,不時陪劉爸爸吹水打牙骹;而男司機就戴cap帽,同保鑣着埋同款風褸,似足制服咁,唔單止負責揸車,仲會幫手拎嘢,打點一切;至於劉家姐,係屋企人,最信得過,做嘢特別上心冇甩漏,劉爸媽自然放心晒!

嗰日,佢哋分頭行事、分工合作,劉媽媽買菜、買肉,劉爸爸就揀生果,劉家姐就買元寶蠟燭香,加上近身同埋保鑣各司其職,有晒隊形,買餐餸都唔簡單!

劉家嘅保鑣同司機着埋同款同色嘅運動風褸,似足着制服咁,有晒隊形。

 

戴口罩嘅男保鑣,陪劉爸爸揀生果,仲會陪佢傾偈打下牙骹。

 

女傭似係來自內地,細心咁攙扶住劉媽媽出入。

 

疑似劉華胞姐嘅女人,一個人去咗香燭店,選購元寶蠟燭香。

 

劉家嘅保安做得相當嚴密,保鑣逐一護送所有人上車,而保鑣個樣睇落仲好威猛,唔出手都已經嚇得下人。