李佳芯收兵男女通殺

李佳芯（Ali）喺無綫彈起快過火箭，孭飛「女一」後，劇接劇冇停手，難得佢仲勁有觀眾緣，網民尤其「巴打」，紛紛封佢做「女神」。不過，「女神」已經心有所屬，同ViuTv藝員男友陳炳銓感情穩定，其他異性唔使旨意埋到佢身，充其量只可做「女神」嘅「觀音兵」。

早前嘅一大朝早七點幾，東姑喺西灣河就遇到Ali，同埋楊卓娜、葉凱茵為新劇《BB來了》拍外景，三個女人仔匿喺餐廳入面化妝整頭，拍完室內景，再轉去室外拍攝，全程Ali同大家都有講有笑，睇嚟份人都冇乜架子，幾好相與。

由於嗰日都幾凍幾大風，每拍完一個鏡頭，幾個女演員都快快脆披番件褸；而東姑見Ali身邊，就有某大傳媒嘅女高層，好細心第一時間遞上杯熱咖啡畀佢暖身，認真殷勤，服侍周到過藝人啲助手或者保母。直至拍攝完結，Ali拉埋隨身嘅拖篋離開；而呢位傳媒女高層繼續亦步亦趨，護送Ali上車走人，就好似Ali嘅「鐵粉」一樣，忠心一片。睇嚟Ali嘅魅力真係無遠弗屆，無分性別都「臣服」喺「娘娘」裙下，樂意做佢嘅「兵」喇！

Ali有同性「女兵」服侍周到，離開嗰時仲獲對方貼身護送，對偶像認真忠心一片。

當日，室外又大風又凍，每拍完一場戲，楊卓娜同葉凱茵，都嗱嗱聲即刻披番件褸。

而Ali就有「女兵」立即遞上熱咖啡，認真窩心又暖心。

嗰日天氣都幾凍下，等埋位前幾個女演員都要蹺埋手，兼且凍到縮埋一嚿。

喺餐廳入面同大家一齊化妝、對稿嘅Ali，睇嚟幾好相與，大夥兒有講有笑。