為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 04 月 08 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

造星勢力

巨星誕生之前,總會經過「璞玉」階段,最近香港影圈嘅《星。勢。力》計劃,就係十位影壇新星嘅蛻變好機會。計劃由一向以品味同眼光著稱嘅劉天蘭(Tina)領軍,更加係信心嘅保證。

今次嘅「Paco巨星飯堂」,就邀得Tina率領其中四位新星:余香凝(Jennifer)、林耀聲、談善言及梁雍婷(Rachel),去到位於九龍灣嘅「大松日」,品嘗精緻嘅日本料理,再從電影出發,細說「造星」背後嘅故事。

Rachel、阿聲、阿談及Jennifer(左至右)都係香港電影圈嘅明日之星,值得關注。

 

舊友相聚

今次嘅飯敍,除咗有一眾新星,仲係我同Tina呢位舊友敍舊嘅好時光。喺我印象中,上一次同佢相聚,已經係八〇、八一年,當時我喺華納中文唱片部任職,仲有幸跟林子祥學到好多錄音室嘅知識,而認識Tina就係同阿Lam有關。

「當年因為徐克導演嘅《鬼馬智多星》,阿Lam係男主角,而我就係副導演,之後我哋一班朋友,就成日同佢喺一個有Live band嘅夜場jam歌,有我、鍾定一、陳國新同岑建勳,到阿Lam要喺紅館開第一次個人演唱會,仲搵咗我哋四個去唱和音,而呢個組合就係『散芬芳』。」

哈哈哈!「散芬芳」後,我就未同Tina相聚過,既然咁有緣,就梗係要高手解說《星。勢。力》,「今次係由『創意香港』推廣嘅活動,我係『香港電影美術學會』嘅代表,改造十個香港新一代嘅電影演員,令外界多啲注意佢哋,亦係對佢哋嘅鼓舞,而《星。勢。力》就係代表呢班新星,係蓄勢待發嘅新力量。」

我帶五位嘉賓去到位於九龍灣嘅「大松日」,品嘗精緻嘅日本料理,再從電影出發,細說《星。勢。力》背後嘅故事。

 

身為「香港電影美術學會」副會長,Tina籌劃及監督《星。勢。力》,為十位曾參與演出「首部劇情電影計劃」作品嘅新演員,打造嶄新形象。

 

特選刺身拼盤($780),按季節轉換款式,包括大拖羅、赤目魚、牡丹蝦、帶子及左口魚等五款當造刺身,賣相賞心悅目。

 

特選手握壽司拼盤($420),選用優質北海道七星米及秘制壽司醋,以中拖羅、左口魚、針魚、小鯛及赤貝等時令上乘嘅食材,配合傳統做法,更能令食材跟壽司米融合。

 

紫菜海膽天婦羅配魚子醬($360),由天婦羅主廚褔田次郎,嚴格把握時間及火候,將紫菜蘸上薄漿酥炸,再放上新鮮北海道海膽及魚子醬,能品嘗酥脆及鮮美之雙重口感。

 

突出個性

而Tina會喺四月十五日舉行嘅《第37屆金像獎頒獎典禮》中,率領新星們現身,對於有份角逐「最佳新演員」嘅Rachel嚟講,更具意義。「呢個活動係一個好特別嘅經歷,我以為拍咗電影(《藍天白雲》)就完晒,點知原來仲有後續,有Tina姐呢位前輩關心自己,又有另外九個新演員一齊,仲一齊去『金像獎』,好似一家人去做一件事咁。」

Jennifer就話:「我啲朋友睇咗改造後嘅相,都話新形象突出到我嘅個性;我最深刻係拍攝嘅時候,工作人員叫我跳舞,平時其實我係比較拘謹嘅人,但嗰一刻我覺得自己釋放咗,嗰種感覺好新奇。」

阿談就表示:「整個過程都好開心,同埋我覺得自己多咗自信心。以前我係冇乜自信嘅人,因為入選咗呢個活動,令我知道自己都有被注視嘅地方。」

講到活動後嘅發展,阿聲話:「我好想演反派,因為身邊好多人話我個樣太正氣,唔適合演反派,我就好想挑戰吓。」

對於未來喺影圈嘅發展,Jennifer(右)表示希望趁青春演出一部純愛情嘅電影,Rachel(左)則希望演出動作電影,一次過挑戰自己嘅演技同體能。

 

分別憑《骨女》及《藍天白雲》入選嘅Jennifer同Rachel(下圖),經改造之下都展現出跟電影截然不同嘅形象。

 

 

 

餐廳助理行政總廚宮迫征弘,有逾四十年嘅豐富入廚經驗,睇佢即席炮製菜式,絕對係視覺上嘅享受。

 

大蜆清湯($120),將有「海中栗子」之稱嘅日本大蜆,與清酒、昆布及鰹魚一起煮熟,讓蜆肉嘅鮮味及海水精華滲入湯中,甘甜無比。

 

鮑魚鐵板燒(時價),精選上乘北海道赤鮑,肉質爽滑鮮甜,配上秘制醬汁享用,特別滋味。

 

日本A5宮崎和牛鐵板燒($1,280/100克),嚴選日本頂級宮崎A5和牛,以鐵板燒帶出其原味。和牛入口即化,配上焦香的外層,香濃肉汁鎖在其中,令人回味。

 

名氣玉子

活動由籌備到正式進行,歷時近半年,新星們除咗得到高手Tina嘅改造,佢哋仲對Tina親自炮製嘅茶葉蛋,念念不忘。「我整呢啲茶葉蛋,並冇咩特別嘅秘方,只係咁多年都有整開,通常係過年整俾啲朋友食。我為呢啲茶葉蛋,改名叫『茶玉子』,仲特別挑咗一個印章。每年過年前,我就等啲朋友落order,然後整好就用紙袋包好,然後喺袋上蓋個印就送俾人。」

名氣出品,試過由友情層面「商業化」。「後來有朋友提議,叫我整啲放喺佢嘅食品舖賣,於是我由每年整幾百隻,變成整上千隻,喺原本嘅『茶玉子』印章旁邊,加埋我個名(天蘭),就成為茶葉蛋嘅包裝。」

喺《點五步》中合作過嘅阿聲同阿談,連擺pose都甚有默契。

 

經過Tina嘅悉心改造,阿聲(上圖)同阿談(下圖)都有令人耳目一新嘅感覺。

 

 

 

Tina為自己以心炮製嘅茶葉蛋,取名「茶玉子」,仲由原本只為好友製作,變成新年期間嘅「上市精點」,認真唔簡單。

 

 

 

汁煮北海道喜知次魚($1,180),主廚選用來自北海道嘅喜知次魚,以醬油、味醂、清酒及糖煮熟,肉質甜美細膩,豐富魚油令魚肉入口即化,香滑無比。

 

北海道毛蟹天婦羅($1,600),嚴選北海道毛蟹,原隻蒸至八成熟,拆肉混合蟹麵豉、蟹膏等釀入蟹蓋,再鋪上海膽及蟹肉酥炸,伴入北海道三文魚子,層次極為豐富。

 

大松日
地址:九龍灣啟祥道17號高銀金融國際中心2樓
電話:31882760