為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 04 月 07 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

股壇哥哥的工業王國

與建滔化工集團(0148)主席張國榮認識近二十年,我哋在千禧年左右初相識,公司已經分拆咗建滔積層板(1888)同建滔銅箔(新加坡上市),又收購線路板龍頭依利安達(1151),市值共近八百億港元。

市場人士叫張國榮主席做哥哥,歌壇哥哥有首名曲H2O,而股壇哥哥就對H2O2、C9H12O2等化學名詞瑯瑯上口,令我呢個化學系畢業生汗顏。但係張兄最令我佩服嘅係佢對工業發展嘅熱誠,能夠帶領一間港資公司建立起一個工業王國,涵蓋化工、覆銅面板、線路板,以至上游嘅玻璃絲、玻璃布、銅箔、環氧樹脂等,組成高度垂直嘅生產鏈,不但可以解決生產上嘅供應瓶頸,如果市場上任何一種材料漲價,公司都可以得益。

子公司建滔積層板在二○○六年上市,我一直持有股份,當日上市價七點七三港元,咁多年連埋將派發嘅二○一七年末期股息,我收超過四港元息。過去公司年年派兩次息,二○一七年派息比率更達70%,基本盈利股本回報率23.4%。由於過去十幾年來公司一直係全球最大覆銅面板生產商,所以對產品有定價權,加上垂直生產優勢,由上市至今營業額複式增長14%,基本純利複式增長18%。二○一七年基本純利增加92%至三十七點三五億港元;至於賬面純利下跌,主要因為二○一六年公司以二十三點八六億港元出售一幅深圳廠地而錄得非經常性收益二十一點二一億港元。由於覆銅面板平均價格增加,公司毛利率由二○一六年22%,提升至29%。

母公司建滔化工在一九九三年上市,至今營業額複式增長27%,純利(不計非經常性項目)複式增長26%,一樣係長期持續增長。二○一七年基本純利增加70%至五十五點八九億港元,末期息一港元,全年派一點六港元。除咗覆銅面板業務增長,印刷線路板亦受惠於通訊網絡設備、汽車及家電訂單而有顯著增長,EBITDA上升35%。

講到手機概念股,好少人會想到手機裏面和基站用嘅線路板,而建滔化工係其中一大高端供應商,今年年初再在惠州收購一間線路板廠,規模優勢可以進一步提升。相信未來中國5G基站和汽車需求會繼續帶動業務增長。張兄最近買咗一匹名駒,正要改名,線路板業務造好,難怪佢話想幫愛駒改為電路一號!

呢幾年建滔化工踏足地產業務做出不俗成績,二○一七年EBITDA上升16%至十九點七億港元。值得留意嘅係公司一路興建和收購出租物業,租金收入近九億港元。公司再購入倫敦物業,相信租金收入會再提升,可為公司提供穩定嘅經常性收入。張兄二仔家成(Eric)負責地產業務,據佢講倫敦投資物業回報率有七、八厘,而且一般簽幾十年長約,每五年議租一次,有加無減,屬穩陣投資。至於新物業發展,除在前海買地之外,張兄認為暫時以銷售手上資源為主,集中發展本業。

建滔化工今年上市廿五周年,四分一世紀之中當然有高低起落,但係管理層一直提升科技,做大兼做得尖端,而下一代嘅加入更加令企業可以走得更遠。

建滔化工集團主席張國榮(右一)及執行董事張家成(Eric)(中)。