為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 03 月 29 日

余文樂開餐冷落嬌妻

三十六歲嘅余文樂(樂仔),去年十二月閃娶台灣「皮帶大王」千金王棠云,咁急結婚,不免令人懷疑雙喜臨門,「樂嫂」陀住「樂B」囉。之不過,兩個人一直未有承認,又未有否認,令呢個懷孕傳聞,愈來愈疑雲陣陣!

咁啱咁蹺,日前東姑遇上樂仔同樂嫂跟一個男性朋友,喺灣仔一間中菜館開餐。東姑當然打雀咁眼,望真樂嫂身形嘅變化,睇清睇楚佢個肚到底有餡定冇餡?好可惜坐低嘅樂嫂,腰以下嘅身體畀張枱布完全遮到實,就算企起身,發現佢件衫都係又大又鬆身嘅款式,真係點(目及)都(目及)唔清真龍定假鳳!

不過,現場所見,樂仔食飯嗰時猛掛住篤電話,老婆喺旁邊同佢傾偈,佢隻眼嘅視線始終冇離開過部電話,當正老婆透明咁;加上,兩個人開餐,仲要約埋個朋友做「電燈膽」,樂仔真係好唔夠體貼囉。話晒結婚到o依家只係短短三、四個月,咁快就一啲新婚甜蜜嘅感覺都冇。咁樣冷落嬌妻,樂仔認真唔啱喇!

當時,樂嫂喺旁邊猛撩樂仔講嘢,但樂仔就掛住望電話,眼角都冇瞄下個老婆。

 

新婚幾個月,樂仔已經冷落嬌妻,仲約埋個男性朋友「三人行」開餐,畀大大個「電燈膽」阻住晒。

 

早前,樂仔同老婆,拉大隊同埋細妹一家人,去泰國旅行,樂嫂着晒泳衣騷大頭自拍照,又搭飛機又游晒水,照睇就唔似粗身大細。

 

樂嫂究竟有餡定係冇餡,係唔係懷有身孕呢?樂仔至今都冇承認又冇否認,搞到好神秘。

 

經常將抱B照放上社交網嘅樂仔,似乎父愛泛濫,應該幾想做老竇。